АҚШ ва Эрон урушни якунлаш ҳамда Ҳормуз бўғозини очишни назарда тутувчи ўзаро англашув меморандумини электрон шаклда имзолади. Бу ҳақда Эрон ТИВ матбуот котиби Исмоил Бақоийга таяниб, “Press TV” хабар берди.
Унинг айтишича, томонлар ҳужжатни электрон тарзда имзолашга келишиб олган ва аввал режалаштирилган Женевадаги расмий маросимга эҳтиёж қолмаган. Бақоийнинг маълум қилишича, меморандумни АҚШ Президенти Дональд Трамп ва Эрон Президенти Масъуд Пезешкиён имзолаган.
“Матн икки мамлакатнинг энг юқори мансабдор шахслари томонидан имзоланганда, уни бузиш табиийки анча жиддий оқибатларга олиб келади. Илгариги тажрибамизни ҳисобга олган ҳолда, айнан шундай бўлишини маъқул кўрдик”, деган Бақоий.
“Axios” нашри манбаларига кўра, ҳужжат кучга кирган. Нашр суҳбатдошларининг таъкидлашича, келишув Ҳормуз бўғозини имкон қадар тезроқ очиш мақсадида жадаллаштирилган.
Манбаларнинг қайд этишича, Вашингтон ва Теҳрон вакилларининг Швейцариядаги учрашуви бекор қилинмаган. Унда АҚШ вице-президенти Жей Ди Вэнс ҳамда Эрон парламенти спикери Муҳаммад Боқир Ғолибоф Эрон ядровий дастури бўйича музокараларни бошлаш масаласини муҳокама қилади.
Нашр маълумотига кўра, Трамп ҳужжатни G7 саммити доирасида Франция Президенти Эммануэль Макрон билан кечки овқат пайтида имзолаган. Шунингдек, ҳужжатга Жей Ди Вэнс ва Муҳаммад Боқир Ғолибоф ҳам имзо чеккан. Манбалар Пезешкиённинг имзоси ҳақида аниқ маълумот бермаган. Уларга кўра, меморандум икки марта имзоланган.
Қайд этиш жоиз, 15 июнь куни Покистон воситачилигида АҚШ ва Эрон тинчлик келишувига эришганини эълон қилган. Шу куни Трамп Ҳормуз бўғози орқали кемалар, жумладан нефть ташувчи танкерлар ҳаракати қайта бошланганини маълум қилган.
