Бугун, 25 май куни “сўнгги қўнғироқ” арафасида 238 та мактаб ўқувчилари автомашиналардан ноқонуний фойдалангани аниқланди. Бу ҳақда Йўл ҳаракати хавфсизлиги хизмати матбуот котиби Зойир Йўлдошов хабар берди.
Маълум қилинишича, тарғибот ишлари олиб борилишига қарамасдан, “сўнгги қўнғироқ” тадбирларида эрталабки соат 7:00 дан 14:00 гача ўқувчиларнинг мактабларга автомашина бошқариб келишлари билан боғлиқ 238 та ҳолат аниқланган.
“Байрамни бахтсизликларсиз ўтказиш учун минглаб йўл-патруль хизмати ва ички ишлар органларининг бошқа соҳавий хизмат ходимлари мактаблар ёнида кучайтирилган тартибда хизмат ўташмоқда. Ўқувчиларнинг ўз ота-онасига тегишли ёки ижарага олган автомашиналарини бошқариб келганликларини кузатиш мумкин. Қоидабузарлар орасида 11, 9 ва ҳаттоки 8-синф ўқувчилари ҳам бор”, дейилади хабарда.
Хоразмда битирув кечасига машина бошқариб келган қизлар ҳам топилган.
“Фарзандларининг катта фожианинг қурбони бўлишига ёки бошқаларнинг ҳам ҳаётини хавф остида қолдиришига замин яратиб бераётган катталардан кўзларини каттароқ очишларини, ёшларнинг тақдирига бефарқ бўлмасликларини сўраймиз. Назорат тадбирлари давом этмоқда”, дейилади ЙҲХБ хабарида.
