Қирғизистон криптовалюталар соҳасидаги миллий стратегиясини амалга ошириш режасини эълон қилди. Режа доирасида KGST номли миллий стейблкоинни ишга тушириш ҳамда давлат секторида Марказий банкнинг рақамли валютасини жорий этиш кўзда тутилган.
Binance криптобиржасининг асосчиси ва собиқ бош директори Чанпен Чжао бу ҳақда ўзининг X ижтимоий тармоғидаги саҳифасида маълум қилди. Унга кўра, KGST тўлиқ тарзда қирғиз соми билан 1:1 нисбатда таъминланади ва аллақачон Рақамли активлар давлат реестрида рўйхатдан ўтган.
KGST бошқа лойиҳадан, яъни USDKG’дан фарқ қилади. USDKG доллар билан таъминланган стейблкоин бўлиб, у Қирғизистон Молия вазирлигининг 500 миллион долларлик олтин захираси билан қўллаб-қувватланади. Лойиҳа ишга туширилиши йилнинг учинчи чорагига режалаштирилган.
Шу билан бирга, Марказий банкнинг рақамли валютаси — “рақамли сом” ҳам ҳуқуқий мақом олди. Яқин орада у давлат тўловларини амалга оширишда синов тариқасида қўлланилиши кутилмоқда.
CoinDesk нашрининг ёзишича, бу ташаббус президент Садир Жапаровнинг апрель ойида мамлакат конституциявий қонунчилигига киритган ўзгартишларидан сўнг амалга оширилган. Мазкур ўзгаришларга кўра, Миллий банк рақамли валютани тўлиқ ишга туширгач, у қонуний тўлов воситаси мақомини олади.
Қирғизистон кенг кўламли крипто инфратузилмасини ҳам ривожлантирмоқда. BNB’ни ўз ичига олган миллий криптовалюта захираси ташкил этилди, ҳуқуқ-тартибот органлари ходимлари учун ўқув дастурлари йўлга қўйилди. Шунингдек, 10 та университет билан ҳамкорлик қилиш мақсадида Binance Academy билан келишув имзоланди.
“Binance ўз иловасини қирғиз тилига мослаштирди ва пойтахт Бишкекда 1000 кишилик учрашув ўтказди”, деб таъкидлади Чжао.
