Шотландия соҳиллари яқинида қарийб 400 йил аввал чўкиб кетган қироллик кемаси – “Blessing of Burntisland” қолдиқлари топилган бўлиши мумкин. Мутахассислар кема бортида бугунги қийматда 20 миллион фунт стерлингга тенг бойлик бўлганини тахмин қилмоқда. Бу ҳақда “The Daily Star” хабар берди.
Маълумотларга кўра, кема Англия қироли Карл I га тегишли бўлган. У 1633 йил июлида қиролнинг тож кийиш маросими вақтида Файф ҳудудидан Лейт порти томон сузиб кетаётганида кучли бўрон сабаб Форт қўлтиғида чўкиб кетган.
Кема тахминан 18 метр узунликда бўлган. Унинг бортида қирол Карл I нинг шахсий буюмлари ва бошқа қимматбаҳо юклар бўлган. 35 нафар йўловчи ва экипаж аъзосидан фақат икки нафари омон қолган.
Чўкиб кетган кемани топиш учун ишқибозлар қарийб 30 йил давомида изланиш олиб борган. Форт қўлтиғидаги лойқа сувлар сабаб аввалги қидирувлар натижа бермаган. Бироқ сув остидаги сканерлаш технологияларининг ривожланиши қидирувчиларга янги имконият берган.
Charles Wrex Project лойиҳаси вакиллари яқинда кеманинг ўзига тегишли бўлиши мумкин бўлган ёғоч бўлагини аниқлаган. Шундан сўнг мутахассисларда “Blessing of Burntisland”нинг эҳтимолий жойлашуви аниқлангани ҳақида умид пайдо бўлган. Бироқ лойиҳа директори ва “Burntisland Heritage” ташкилоти раҳбари Иэн Арчибальд ҳозирча кеманинг топилгани ҳақида қатъий хулоса қилишга эрта эканини таъкидлаган.
Унинг сўзларига кўра, мутахассислар тарихий кема қолдиқлари бўлиши мумкин бўлган жойни аниқлаган, аммо айнан шу кема эканини ҳали тасдиқлашмаган. Топилган ёғоч намунаси ҳам ҳозирча қайси кемага тегишли экани номаълум.
Кейинги босқичда намуна радиокарбон усулида текширилиши режалаштирилмоқда. Шунингдек, сув остидаги ҳудуд батафсил ўрганилиб, у ерда бошқа буюмлар ёки кема қолдиқлари бор-йўқлиги аниқланади.
Қайд этилишича, Форт қўлтиғи тубида 500 га яқин кема ҳалокати қайд этилган. Шу сабабли топилманинг айнан қироллик кемасига тегишли эканини тасдиқлаш учун қўшимча тадқиқотлар талаб этилади.
