АҚШ Венесуэлага қўйилган денгиз блокадасини бекор қилиб, мамлакат нефти экспорти устидан назорат ўрнатишни режалаштирмоқда. Бу ҳақда АҚШ энергетика вазири Крис Райт маълум қилди.
Райтнинг айтишича, нефть савдосидан тушган маблағлар АҚШ назоратидаги ҳисоб рақамларига йўналтирилади ва кейинчалик Венесуэла иқтисодиётини тиклашга сарфланади. Дастлаб Венесуэла омборларида сақланаётган нефть сотилади, шундан сўнг эса “номаълум муддат” давомида мамлакатда қазиб олинадиган нефть экспорт қилинади.
АҚШ президенти Дональд Трамп 6 январь куни Венесуэла санкциялар остида қолган 30 миллиондан 50 миллион баррелгача нефтни АҚШга беришини айтганди. У бу маҳсулот бозор нархида сотилиши, тушган маблағ эса “икки мамлакат халқлари манфаати учун” сарфланишини билдирган.
Сотув назорати ва санкцияларни юмшатиш
“Ҳозиргидек нефть етказиб беришни тўсиб қўйиш ўрнига, биз нефтни АҚШ ва бутун дунёдаги нефтни қайта ишлаш заводларига етказиб беришга рухсат берамиз, бироқ бу сотувни АҚШ ҳукумати амалга оширади”, деди Крис Райт.
Bloomberg агентлигига кўра, маблағларни АҚШ Молия вазирлиги ҳисоб рақамларига жойлаштириш уларни Венесуэла кредиторларидан ҳимоя қилиш имконини беради. АҚШ мамлакатга нисбатан санкцияларни босқичма-босқич юмшатишни ҳам кўриб чиқмоқда. Трамп Венесуэланинг нефть саноатини тиклаш учун Американинг Chevron, ConocoPhillips ва Exxon Mobil компанияларини жалб қилмоқчи. Венесуэла нефть инфратузилмасини реконструкция қилиш эса 100 миллиард долларга тушиши мумкин.
Венесуэла ҳудудидаги нефть захиралари дунёдаги энг йирик аниқланган нефть захиралари ҳисобланади. 2005 йилгача бу мамлакат АҚШ учун энг йирик нефть етказиб берувчи эди. Бироқ Венесуэланинг ўша пайтдаги раҳбари Уго Чавес 2007 йилда саноатни миллийлаштириб, шу жумладан, мамлакатда ишлаётган Америка компанияларининг мулкини мусодара қилгандан сўнг вазият тубдан ўзгарди.
