Бугун, 26 июнь куни кичик самолёт Хитой пойтахти Пекиндаги энг баланд бинога бориб урилди. Бу ҳақда CNN хабар берди.
Нашрнинг ёзишича, кичик самолёт Пекиндаги энг баланд бино – “China Zun” номи билан ҳам танилган 109 қаватли CITIC Tower осмонўпарига урилган. Ижтимоий тармоқларда эълон қилинган тасвирларда бинодан парчалар тушаётганини кўриш мумкин. Улардан такси машинаси зарар кўрган бўлиши мумкин. Шунингдек, фотосуратларда самолётнинг бино ёнида, ерда ётган дум қисми ҳам муҳрланган.
Нашр журналисти осмонўпар бинодан эвакуация қилинган одамлар кириш жойи яқинидаги кўчаларда тўпланганига гувоҳ бўлган. Уларнинг ёнида ўт ўчириш машиналари, полиция автомобиллари ва тез ёрдам ҳам бўлган.
Ушбу ҳодиса фуқаролик авиацияси билан шуғулланувчи маҳаллий компанияга тегишли бўлган, Хитойда ишлаб чиқарилган “Sunward SA 60L Aurora” енгил спорт самолёти иштирокида содир бўлган деб тахмин қилинмоқда. Хитой расмийлари ҳозирча юз берган воқеа юзасидан ҳеч қандай изоҳ бермаган.
