Тошкент вилоятида ўқувчиларни ҳақоратлаб, китоб билан урган ўқитувчи ишдан олинди. Бу ҳақда вилоят мактабгача ва мактаб таълим бошқармаси хабар қилди.
Ижтимоий тармоқларда ўқитувчининг бу ҳаракатлари акс этган видео 28 октябрда тарқалганди. Расмий ахборотда маълум қилинишича, ҳолат 2025 йил май ойида Ўрта Чирчиқ туманидаги 11-сонли умумтаълим мактабида жисмоний тарбия ўқитувчи А.Л. томонидан ўзи раҳбарлик қилаётган 9-синф ўқувчиларига нисбатан содир этилган.
У ўқувчиларнинг ўзлаштириши, дарсларда иштироки паст эканини рўкач қилиб, одоб-ахлоқ қоидаларига зид бўлган сўзлар билан ўқувчиларни ҳақорат қилиб, уларни шаъни, қадр-қимматини топтаб, калтаклаган.
Ҳолатни ўрганиш мақсадида тузилган масъуллардан иборат ишчи гуруҳ ўқитувчининг хатти-ҳаракатларини ноқонуний ва педагогик тарбия меъёрларига тўғри келмаслигини қонуний асослар билан кўрсатиб берган. Ҳолат шу кунга қадар мактабнинг маънавий масалалар бўйича директор ўринбосари томонидан ўрганилмагани, ўқитувчини тартибга чақирмагани ҳам аниқланган.
Қайд этилишича, айни пайтда мактабнинг жисмоний тарбия ўқитувчиси билан тузилган меҳнат шартномаси бекор қилинган. Мактаб директори ўринбосарига ҳайфсан интизомий жазо чораси қўлланилган.
“Шу ўринда айтиб ўтиш керак, вазият ҳуқуқ тартибот органлари томонидан назоратга олинган. Ўрганиш ишлари олиб борилмоқда”, дейилади бошқарма хабарида.
