Жиноят оламида танилган шахс Майкл Франчезе америкалик молиячи Жеффри Эпштейннинг ўлимига оид янги тафсилотларни ошкор қилди. Бу ҳақда у “NewsNation”га берган интервьюсида сўз очди.
Франчезенинг сўзларига кўра, у Эпштейннинг ўз жонига қасд қилгани ҳақидаги расмий версияга ишонмайди. У Нью-Йоркдаги ахлоқ тузатиш марказида 7 ой давомида бир камерада бўлган, кейинчалик айнан шу жойда Эпштейнсақланган.
“Биринчи навбатда шуни айтишим керак: у ерда ўз жонига қасд қилишнинг иложи йўқ. Мутлақо имконсиз. Қамоқхона тузилиши шундай ишлаб чиқилганки, бундай ҳолатларга йўл қўйилмайди”, дейди у.
Маълум бўлишича, журналистлар Эпштейн вафотидан кейинги дастлабки дақиқалар тасвирланган қамоқхона ҳисоботини ҳам ўрганган. Унга кўра, лейтенант камерага кирганида, 3-офицер Эпштейнга сунъий нафас бераётган бўлган. Сўнг лейтенант ҳам сунъий нафас беришни бошлаган. Лейтенант диспетчерга қўнғироқ қилиб, тез ёрдамни чақириш кераклигини айтган. Ҳодиса вақтида 2-офицер: “Биз соат 3 ва 5 да текширув ўтказмаганмиз”, дея изоҳ берган. 3-офицер эса жуда тушкун ҳолатда: “Биз ҳаммасини барбод қилдик”, деган.
АҚШ Адлия вазирлиги ҳужжатига кўра, Эпштейн қамоқхона камерасида топилганидан сўнг тиббиёт бўлимига олиб ўтилган. У ерда тез ёрдам етиб келгунига қадар ҳамшира унга сунъий нафас берган. Шошилинч ёрдам шифокори Эпштейннинг ўлим вақтини 2019 йил 10 август куни соат 7:36 деб қайд этган.
Бундан ташқари, бош инспектор қамоқхонаинг мазкур қаватда “шахси аниқланмаган тўқ сариқ рангли фигура”ни кўрганини маълум қилган.
