Польшанинг ғарбий қисмида ичида 200 нафар пассажири бўлган икки йўловчи поезди тўқнашиб кетди. Бу ҳақда Польша давлат ахборот агентлигига таяниб, TVP World хабар берди.
Маҳаллий фавқулодда хизматларнинг маълумотига кўра, кеча, 25 июнь куни ҳодиса Буюк Польша воеводалигидаги Пила тумани ҳудудида жойлашган Бялосливе қишлоғи яқинида маҳаллий вақт билан соат 18:04 атрофида содир бўлган. Тўқнашувда Пила–Бидгошч йўналишида ҳаракатланган Polregio минтақавий поезди ҳамда Бялогард–Варшава-Всходня йўналишида қатнаган PKP Intercity поезди иштирок этган.
Дастлабки маълумотларга кўра, минтақавий поезд Intercity поездининг орқа қисмига келиб урилган. Оқибатда Intercity поездининг охирги вагони ҳамда иккинчи поезднинг бир қисми рельсдан чиққан. Фавқулодда хизматларнинг маълум қилишича, тўқнашув вақтида икки поездда жами 200 нафарга яқин йўловчи бўлган.
Буюк Польша ёнғин хизмати матбуот котиби Мартин Халаш PAP агентлигига “бир неча киши” жароҳат олганини билдирган.
“Ҳозир жабрланганларни саралаш жараёни давом этмоқда. Қанча одамга тиббий ёрдам кераклиги ва уларга қандай даражада ёрдам кўрсатилиши аниқланмоқда”, деган у.
Ҳодиса жойида ёнғин хизматининг 16 та бўлинмаси, шунингдек полиция ва тез тиббий ёрдам ходимлари иш олиб бормоқда. Тўқнашув туфайли Пила–Бидгошч темир йўл йўналишида ҳаракат тўлиқ тўхтатилган. Польша темир йўл инфратузилмаси оператори матбуот котиби Бартош Петржиковскийнинг айтишича, ҳаракат фақатгина мутахассислар авария темир йўл излари ёки бошқа инфратузилмага зарар етказмаганини тасдиқлаганидан кейин қайта тикланади.
PKP Intercity’нинг дастлабки маълумотларига кўра, поездлар юзма-юз тўқнашмаган. Улар стрелка орқали йўл алмаштириш жараёнида бир-бирига тегиб кетган бўлиши мумкин. Дастлабки тахминларга кўра, минтақавий поезд Intercity поездининг орқа қисмига урилган, аммо ҳодисанинг аниқ сабаблари ҳали расман тасдиқлангани йўқ.
