Польша полицияси томонидан тақдим этилган сўнгги маълумотларга кўра, мамлакатда қонуний равишда эгалик қилинган ўқотар қуроллар сони биринчи марта 1 миллиондан ошди. Бу ҳақда “Euronews” хабар берди.
Қайд этилишича, Польша 2025 йилда рекорд даражадаги 50 700 та қуролга рухсатнома берган. Бу эса рўйхатдан ўтган фуқаролик ўқотар қуролларининг умумий сонини биринчи марта 1 миллиондан ошишига сабаб бўлган.
Ўтган йил охирига келиб, фаол рухсатномалар сони 411 769 тага етган. Бу 2015 йилда рўйхатдан ўтган 192 819 тадан икки бараварга кўп.
2025 йилда энг кўп аризалар 21 071 та билан коллектор рухсатномаларига тўғри келган. Спорт рухсатномалари 17 601 та билан иккинчи ўринда. Шунингдек, шахсий ҳимоя учун 7254 та рухсатнома аризалари келиб тушган.
Эгалик ҳуқуқининг кўпайиши 2022 йилда бошланган. Ўшанда 2021 йилги 19 939 тага нисбатан 37 402 та янги рухсатнома берилган. Польша отиш полигонлари ўша йилнинг февраль ойида Россиянинг Украинага тўлиқ миқёсда бостириб киришидан кейинги ҳафталарида ташриф буюрувчилар сонининг кескин ошгани ҳақида хабар берган.
Ўсиш суръатларига қарамай, ҳар 100 польшаликка тахминан 2,5 та ўқотар қурол тўғри келган. Бу Европа Иттифоқидаги энг паст кўрсаткичдир. Финляндия ҳар 100 кишига 32,4 та қурол билан рейтингда етакчилик қилмоқда. Ундан кейинги ўринларни Австрия 30 ва Кипр 29,1 та қурол билан эгаллаган.
Маълум бўлишича, танқидчилар рухсатнома тизимини ислоҳ қилишга чақирган. Варшава полициясининг собиқ бошлиғи, жиноий терроризм ва қотиллик ишлари бўйича ишлаган Дариуш Лорантининг айтишича, ҳозирги тизим жуда кўп ваколатларни битта идорага жамлаган.
Польша қонунлари алкоголь таъсирида қурол олиб юриш ёки унга эгалик қилишни қатъиян тақиқлайди.
“Кимдир қурол билан бўлса, у ароқ ичмайди”, деган Лоранти ўз сўзида.
Шунингдек, у руҳий тушкунлик аломатлари бўлган ҳар қандай кишига қуролга эгалик қилиш тақиқланиши кераклигини айтиб, янада қатъийроқ текширувлар ўтказишга чақирган.
