Польшанинг собиқ адлия вазири Збигнев Зёбро ўзига нисбатан қўйилган жиноий айбловлар сабаб ватанидан қочиб, Венгрия орқали Америка Қўшма Штатларига кетганини тасдиқлади. Бу ҳақда унинг ўзи кеча, 10 май куни Польшанинг ўнг қанот партиясига хайрихоҳ телеканали Republika’га берган интервьюсида маълум қилган.
“Мен Америка Қўшма Штатларидаман. Кеча келдим ва бу мамлакат бўйлаб учинчи сафарим”, деган у хабарда.
Зёбро Польшада бир нечта жиноий айбловлар бўйича қидирувда. Агар у айбдор деб топилса, 25 йилгача қамалиши мумкин. Айбловлар қаторида ваколатни суиистеъмол қилиш, уюшган жиноий тузилмага раҳбарлик қилиш ҳамда жиноят қурбонлари учун ажратилган маблағларга Исроилнинг Pegasus айғоқчи дастурини сотиб олиш киради.
Терговга кўра, бу дастур сиёсий рақибларни кузатиш учун ишлатилган.
Зёбро эса, барча айбловларни рад этиб, Польшадаги марказчи ҳукуматни консерваторларга қарши “сеҳргарлар овини” олиб бораётганликда айблаган.
Ўтган йили Венгрия бош вазири Виктор Орбан ҳукумати Зёброга сиёсий бошпана берган эди. Бироқ апрель ойидаги сайловларда Орбан партияси мағлуб бўлгач, янги Бош вазир Петер Мадяр Венгрия энди бошқа давлатлар қидираётган шахсларни ҳимоя қилмаслигини билдирди.
“Венгрия энди халқаро қидирувдаги жиноятчилар учун паноҳгоҳ бўлмайди”, деган у журналистларга.
Мадяр, мисол сифатида Зёбро ва унинг собиқ ўринбосари Марчин Романовскийни келтирди. Романовский қарийб 40 миллион еврони ўзлаштиришда гумон қилинмоқда.
Польшанинг либерал телеканали TVN24 Зёбронинг Ньюарк Либерти халқаро аэропортида туширилган суратини эълон қилди. Аввалроқ, Польша унинг барча сафар ҳужжатлари, жумладан дипломатик паспорти бекор қилинганини айтган эди. Шу боис, унинг Америка Қўшма Штатларига қандай киргани ҳозирча ноаниқ.
“Onet” нашрининг ёзишича, Зёбро Republika телеканали билан боғлиқ журналистик виза олган бўлиши мумкин. Кейинчалик телеканал уни АҚШдаги сиёсий шарҳловчи сифатида ишга олганини маълум қилган. Польша Адлия вазири Вальдемар Журек X ижтимоий тармоғида Польша АҚШ ва Венгриядан Зёбронинг қандай ҳуқуқий асосда мамлакатга киргани ҳақида изоҳ сўрашини билдирган.
“Биз Збигнев Зёбро ва Марчин Романовский Польша адлия тизими олдида жавоб беришини таъминлаш ҳаракатларини тўхтатмаймиз”, деб айтган Журек.
Шунингдек, у Зёбронинг АҚШда эканлиги тасдиқланса, Польша уни экстрадиция қилишни сўрашини ҳам айтган.
