Массачусетс технология институти (MIT) астрофизиклари коинотда янги астрономик объектни кашф этди. Натуре журналида чоп этилган тадқиқотга кўра, бу объект юлдуз ва қора туйнукнинг бирикмасидан иборат.
“Биз Катта портлашдан 660 миллион йил ўтиб пайдо бўлган, ўзига хос хусусиятларга эга манбани аниқладик. Объект ичидаги водород шунчалик кучли қизиган ва нурланяптики, у ўзидан ноодатий даражада кучли ёруғлик тўлқинларини таратмоқда”, дейилади мақолада.
Аниқланган объект улкан юлдузга ўхшайди. Ҳажми бўйича уни Қуёш тизими билан солиштириш мумкин. Лекин у маълум бўлган ҳар қандай юлдуздан юз миллиардлаб марта кўпроқ энергия чиқаради.
Тадқиқотнинг етакчи муаллифи Роҳан Наидунинг айтишича, бу мутлақо янги турдаги астрономик объект бўлиши керак. У юлдуз ва қора туйнукнинг бирикмасини эслатади. Қолаверса, моделлаштириш бундай қувватни фақат шундай объект таратиши мумкинлигини тасдиқлади. Топилма ўз туридаги биринчи объектга айланди.
