Қамчиқ довонининг юқори нуқталарида 5 декабрда ҳам майдалаб ёмғир ва қор ёғишда давом этаётгани сабаб ФВВ ҳайдовчиларни барча хавфсизлик чораларини кўришга чақирди.
Куни кеча довонда қор ёғиши муносабат билан йўлларда хавфсиз ҳаракатни таъминлаш бошланган, ФВВ қутқарувчилари томонидан назорат тадбирлари олиб борилиб, йўлда қолиб кетган ҳайдовчи ва уларнинг автотранспорт воситаларига ёрдам кўрсатилмоқда.
“Қамчиқавтойўл ИЙФК” ДМ томонидан йўл қопламасида сирпанчиқ бўлмаслиги учун машина-механизмлар ёрдамида туну кун қум-туз аралашмаси сепиш ва йўлларни қордан тозалаш ишларини амалга оширишмоқда.
Айни пайтда довонда икки томонлама автомобиллар ҳаракати давом этмоқда.
Прогнозларга кўра, 6 декабрь куни республиканинг тоғолди ва тоғли ҳудудларида ҳаво ўзгарувчан бўлади, баъзи жойларда ёғингарчилик (ёмғир, қор) бўлади, туман тушиши мумкин. Ҳарорат кечаси 1-6 даража совуқ, кундузи 0-5 даража илиқ бўлади.
