“The Athletic” таҳлилчилари дунёнинг энг кам баҳоланган футболчилари рўйхатини тузди. Ундан “Манчестер Сити” ҳамда Ўзбекистон миллий терма жамоаси ҳимоячиси Абдуқодир Ҳусанов ҳам ўрин олди.
Қайд этилишича, кўпчилик 22 ёшли ўзбекистонлик футболчини ўтган мавсум “Челси”га қарши ўйиндаги омадсиз дебютидан сўнг уни йўқолиб кетадиган истеъдод деб ҳисоблаган. Бироқ ўша учрашувдан кейин Ҳусанов сезиларли даражада ўсиб, ўзининг кучли томонларини намоён эта бошлаган.
Қайд этилишича, ҳимоячи юқори тезлиги, ўйинни тўғри ўқиш қобилияти ва тўп учун кескин курашиши билан ажралиб туради. Баъзан у ортиқча тажовузкорлик кўрсатиши мумкин, аммо бу тузатиш мумкин бўлган жиҳат сифатида баҳоланмоқда. Шунингдек, у тўп билан муомала қилишда ҳам анча ишончли футболчи ҳисобланади.
Шунингдек, ушбу рўйхатга “Реал Мадрид”дан Федерико Вальверде, “Манчестер Юнайтед”дан Харри Магуайр, “Манчестер Сити”дан Бернарду Силва, ПСЖдан Жоао Невеш, “Бавария”дан Ҳарри Кейн ва Александар Павлович, “Барселона”дан Эрик Гарсия, “Галатасарай”дан Виктор Осимхен, “Арсенал”дан Юрриен Тимбер ҳамда “Кристал Пэлас”дан Митчелл Тайрик ҳам киритилган.
