Исроил ҳарбийлари матбуот котиби Авичай Адраэе Ливан жанубидаги Тир тумани, Януҳ қишлоғи аҳолисини яҳудий армияси тез орада ҳужум қилишни режалаштираётгани ҳақида огоҳлантирди. Айни пайтда, Ливан бош вазири мамлакатга кенг кўламли ҳужум уюштирилиши ҳақида хабар олганини билдирди. Бу ҳақда Al Jazeera ва Anadolu нашрлари хабар берди.
Адраэе баёнотида ҳарбий кучлар “Ҳизбуллоҳ” инфратузилмасини нишонга олаётганини айтган. У қишлоқдаги бино харитасини тақдим этиб, яқин атрофдаги аҳоли дарҳол эвакуация қилиниши кераклигини таъкидлаган.
“Исроил кенг кўламли ҳужумга тайёрланмоқда”
Ливан Ташқи ишлар вазири Юсуф Ражий Исроил мамлакатга қарши кенг кўламли ҳужумлар тайёрлаётгани ҳақида араб ва халқаро манбалардан хабар олганини маълум қилди. Вазирнинг таъкидлашича, сулҳга қарамай, Исроил Ливан ҳудудига зарбалар беришда давом этмоқда ва ушбу ҳужумларни тўхтатиш учун фаол дипломатик саъй-ҳаракатлар олиб борилмоқда. Ражий Исроил ҳужумлари “Сулҳни кузатиш қўмитаси” ҳомийлигида олиб борилаётган музокараларга параллел равишда давом этаётганини қайд этган.
“Биз араб ва халқаро манбалардан Исроил Ливанга қарши кенг кўламли ҳарбий операцияга тайёрлаётгани ҳақида огоҳлантиришлар олдик”, деган у.
Вазир Ливан армияси йил охиригача мамлакатнинг жанубий ҳудудларига, яъни, Литани дарёсидан жанубга тўлиқ жойлаштирилишини маълум қилган. Шунингдек, бу муддат ичида “Ҳизбуллоҳ”нинг қуролсизлантирилиши амалга оширилишини айтган.
“Бу босқичда биз Исроил билан тинчлик шартномаси тузишдан узоқмиз”, деган у.
“Ҳизбуллоҳ қуроллари Исроил ҳужумларини тўхтата олмади”
Қурол монополияси масаласига тўхталар экан, Ражий “Ҳизбуллоҳ”нинг қуроллари Исроил ҳужумларининг олдини олишга қодир бўлмаганини таъкидлаган.
Миллий хавфсизлик манфаатлари учун ҳукумат “Ҳизбуллоҳ” билан қуролсизлантириш бўйича музокара олиб бормоқда. Аммо гуруҳ ҳозирча бунга рози эмас. “Ҳизбуллоҳ” қуролларни топшириши керак, деган амалдор.
