Таиланд Камбоджа билан чегарадаги тўқнашувлар сабаб Трат провинциясида комендантлик соати жорий этди. Бу ҳақда Reuters хабар берди.
Камбоджа билан тўқнашувлар баҳсли чегара ҳудудининг қирғоқбўйи минтақаларига ҳам ёйилди. АҚШ президенти Дональд Трамп 12 декабрь куни томонлар ўт очишни тўхтатишга рози бўлганини айтганига қарамай, вазият кескинлигича қолмоқда. Камбоджа Таиланд билан чегарадаги барча ўтиш пунктларини ёпган.
“Умуман олганда, Камбоджа 13 декабрь куни ўт очишни тўхтатишга тайёрлигини билдирганига қарамай, тўқнашувлар узлуксиз давом этмоқда. Таиланд дипломатик ечимга очиқ, аммо музокаралар бошлашдан олдин Камбоджа биринчи навбатда душманлик ҳаракатларини тўхтатиши керак”, деди Таиланд Мудофаа вазирлиги матбуот котиби контр-адмирал Сурасант Конгсири.
Таиланд ҳарбийлари 13 декабрь куни Камбоджа оғир қуроллар етказишда фойдаланган кўприкни вайрон қилгани ҳамда Коҳ Конг провинциясидаги артиллерия нишонларига қарши операция бошлаганини маълум қилди. Камбоджа эса Таиландни фуқаролик инфратузилмасига зарба беришда айблади.
Комендантлик соати Коҳ Конг билан чегарадош Трат провинциясининг беш туманида амал қилади. Коҳ Чанг ва Коҳ Коод сайёҳлик ороллари бундан мустасно. Аввалроқ Таиланднинг шарқидаги Сакео провинциясида ҳам комендантлик соати жорий этилган, у ҳануз кучда.
Таиланд ва Камбоджа 8 декабрдан бери 817 километрли чегара бўйлаб бир нечта нуқталарда оғир қуроллардан ўқ алмашмоқда. Бу июль ойида Трамп ва Малайзия воситачилигида якунланган беш кунлик тўқнашувлардан бери энг шиддатли жанглар ҳисобланади.
Трамп 12 декабрь куни Таиланднинг муваққат бош вазири Анутин Чарнвиракул ва Камбоджа бош вазири Ҳун Манет билан суҳбатлашиб, томонлар “барча отишмаларни тўхтатишга” келишиб олганини айтди. Бироқ 13 декабрь куни Анутин “еримиз ва халқимизга таҳдидлар тугамагунча курашни давом эттирамиз”, дея баёнот берди.
