Конго Демократик Республикасидаги конда юз берган кўчки оқибатида 200 дан ортиқ одам ҳалок бўлди. Бу ҳақда мамлакат Кончилик вазирлигига таяниб Reuters хабар берди.
Кўчки Рубая колтан конида кучли ёғингарчилик сабаб юзага келган. Конни назорат қилаётган AFC/М23 исёнчи гуруҳи вакили аввалроқ ҳодисада атиги 5–6 киши вафот этганини айтганди.
Рубая кони жаҳон колтан захирасининг, тахминан, 15 фоизини ишлаб чиқаради. Колтан қайта ишланиб, тантал металига айлантирилади.
Бу металл смартфонлар, компьютерлар, самолёт деталлари ва газ турбиналари ишлаб чиқаришда кенг қўлланади. Кон ҳудуди 2024-йилдан бери AFC/М23 исёнчилари назоратида. Яқинда у Конго ҳукумати томонидан АҚШга таклиф қилинаётган муҳим кон лойиҳалари рўйхатига ҳам киритилган.
Исёнчилар назоратидаги ушбу конда хавфсизлик чораларини кучайтириш сабаб ишларни вақтинча тўхтатиб туриш тавсия этилган эди. Воқеа сўнгги кунларда кузатилган кучли ёмғирлар билан боғлиқ.
Кончилик вазирлиги маълумотига кўра, қурбонлар орасида қарийб 70 нафар бола бор. Кўплаб жароҳатланганлар Гома шаҳридаги тиббиёт муассасаларига эвакуация қилинган.
