Чехиянинг Злате-Гори шаҳрида захираси 11 тонна олтинни ташкил этадиган кон топилди. Бу ҳақда DIAMO давлат корхонаси хабар берди.
Дастлабки ҳисоб-китобларга кўра, ўн йил ичида рудадан тахминан 6,2 тонна металл ажратиб олиш мумкин. Конда олтиндан ташқари мис ва рух ҳам бор. Йилига 200 минг тонна руда қайта ишланган тақдирда, ундан 265 тонна мис ва 1 556 тонна рух олиш мумкин. Мутахассислар конда галлий мавжудлигини ҳам ўрганмоқда.
Қазиб олишнинг тахминий давомийлиги ўн йилни ташкил этади, бироқ бу муддат якуний эмас. Лойиҳа 15 йилга мўлжалланган. Бу уч йил тайёргарлик, ўн йил ишлаб чиқиш ва икки йил эксплуатацияни якунлаш ва зарар кўрган ҳудудларни тиклашни ўз ичига олади. Кейинги геологик қидирув ишлари қўшимча захираларни аниқлаши ва коннинг ишлаш муддатини узайтириши мумкин. Лойиҳани амалга ошириш натижасида 120 га яқин иш ўрни яратилиши кутилмоқда.
DIAMO янада батафсил тадқиқотлар ўтказиши, геологик қидирувни давом эттириши ва лойиҳанинг атроф-муҳитга таъсирини баҳолаши керак. Мутахассислар сув ресурслари учун эҳтимолий оқибатларни, шовқин ва чанг даражасини, транспорт юкламасини ва портлатиш ишларининг хавфсизлигини текшириши лозим. Хусусан, тахмин қилинган портлаш жойидан тахминан 2,5 километр узоқликда жойлашган EDEL санаторийсини ҳисобга олиш керак, у ерда спелеотерапия ўтказилади. Конни ўзлаштириш бўйича якуний қарор ҳали қабул қилинмаган.
