АҚШ Сурияда ИШИДга қарши ҳужумлар чоғида 20 дан ортиқ қирувчи самолётни ишга солиб, 35 дан ортиқ нишон бўйича 90 дан зиёд ўқ-дориларни қўллади. Бу ҳақда CNN хабар берди.
АҚШнинг Суриядаги ҳарбий амалиёти давомида “Исломий давлат” (ИШИД) билан боғлиқ 35 дан ортиқ нишон бўйича 90 дан ортиқ юқори аниқликдаги ўқ-дорилар қўлланган.
Зарбаларда ўндан ортиқ ҳарбий самолётлар иштирок этган. Расмий вакилнинг қўшимча қилишича, ҳужумларда F-15E, A-10, AC-130J, MQ-9 русумидаги самолётлар, шунингдек Иорданияга тегишли F-16 қирувчилари ҳам қатнашган.
Ушбу зарбалар ҳақида АҚШ Марказий қўмондонлиги матбуот хизмати хабар берган. Уларнинг маълумотига кўра, ҳужумлар кеча, 10-январь куни Шарқий вақт билан соат 12:30 да амалга оширилган.
Пит Ҳегсетнинг айтишича, зарбалар 13 декабрь куни Пальмира шаҳрида ИШИД жангариси томонидан Сурия хавфсизлик кучлари ва АҚШ ҳарбийларининг қўшма патрулига уюштирилган ҳужумга жавоб бўлган. Ўшанда икки нафар АҚШ ҳарбийси, америкалик фуқаро бўлган таржимон ва икки нафар суриялик ҳалок бўлган, яна уч америкалик ҳарбий яраланган. Патрулга уюштирилган ҳужумни ёлғиз жангари амалга оширгани, у қарши ўт очиш чоғида йўқ қилингани хабар қилинган.
Пентагоннинг расмий вакили Шон Парнеллнинг айтишича, ҳалок бўлган ҳарбийлар ушбу минтақада ИШИДни ҳам ўз ичига олган террорчи гуруҳларга қарши йўналтирилган операцияда иштирок этган. Пит Ҳегсет эса ҳужумни амалга оширган шахс иттифоқчи кучлар томонидан йўқ қилинганини билдирган.
