Эрон ва АҚШ ўртасидаги музокараларнинг учинчи босқичи 26 февраль куни Швейцариянинг Женева шаҳрида бўлиб ўтади. Бу ҳақда 22 февраль куни Уммон Ташқи ишлар вазири Бадр ал-Бусаидий ўзининг Х саҳифасида маълум қилди.
Вазир эълон қилган баёнотда АҚШ ва Эрон ўртасидаги навбатдаги учрашув Швейцариянинг Женева шаҳрида ўтказилиши режалаштирилганини тасдиқлаган. Унинг сўзларига кўра, томонлар келишувни якунлаш йўлида навбатдаги муҳим қадамни қўйиш учун ижобий истиқболлар мавжудлигини билдирган.
Маълумотларга кўра, музокаралар воситачилар орқали олиб борилмоқда. Музокараларнинг биринчи босқичи жорий йилнинг 6 февраль куни Уммон пойтахтида бўлиб ўтган эди. Иккинчи босқич эса 17 февраль куни Женевада ўтказилган.
Уммон анъанавий равишда Теҳрон ва Вашингтон ўртасидаги дипломатик мулоқотда воситачи сифатида иштирок этиб келади. Томонлар Эроннинг ядровий дастури, санкциялар масаласи ҳамда минтақавий хавфсизлик билан боғлиқ масалаларни муҳокама қилаётгани айтилмоқда.
Учинчи босқич музокаралари томонлар ўртасида эҳтимолий келишувга эришиш йўлида муҳим аҳамият касб этиши кутилмоқда.
