Мексиканинг Уруапан шаҳри мэри Карлос Мансо отиб ўлдирилди. У наркокартелларга қарши қатъий позицияси билан танилганди. Бу ҳақда El Pais хабар берди.
Расмий маълумотларга кўра, қуролли ҳужумда гумон қилинган икки киши қўлга олинган, яна бири отишма чоғида ўлдирилган. Ҳужум 1 ноябрь куни, Марҳумлар куни нишонланаётган пайтда, шаҳар марказида содир бўлган. 40 ёшли Мансо шамлар фестивали муносабати билан омма олдида нутқ сўзлаган. Шу пайт камида бешта ўқ овози янграган. Мэр оғир жароҳатлар билан шифохонага етказилган, бироқ вафот этган.
Мичоакан штати губернатори воқеани кескин қоралаб, қотиллик юзасидан терговга барча хавфсизлик хизматлари жалб этилганини билдирди. Ҳужум ортидаги мотив ҳали аниқланмаган. Мансо илгари Мексика президенти Клаудия Шейнбаумнинг уюшган жиноятчиликка қарши сиёсатини очиқ танқид қилган. У штат ҳамда федерал ҳукуматдан кўпроқ ёрдам сўраган. Қотилликдан бир ой аввал у ўз ҳаётига таҳдидлар мавжудлигини айтганди.
El Pais нашрининг ёзишича, Мансо асосан Мексиканинг энг фаол ва хавфли жиноий тузилмаси — “Янги авлод Халиско” (Cártel de Jalisco Nuyeva Generación, CJNG) картелига қарши курашни кучайтирган. Август ойида полиция ушбу гуруҳнинг “Рино” лақабли маҳаллий раҳбари Рене Белмонтени ҳибсга олганди. Шундан сўнг Мансо яна марказий ҳукуматдан хавфсизлик чораларини кучайтиришни сўраган.
Мичоакан штати Мексиканинг авокадо экспорти маркази бўлиб, бу ерда “La Familiya”, “Тамплиерлар” ва “Янги авлод Халиско” сингари бир нечта картеллар фаолият юритади. Гуруҳлар ўртасидаги рақобатнинг қурбонлари оддий теримчилардан тортиб йирик тадбиркорларгача етади. 2024 йил ёзида штатда зўравонлик кучайгани сабабли АҚШ Мексика авокадоси импортини икки ҳафтага тўхтатган эди.
