Канада бош вазири Марк Карни АҚШ президенти Дональд Трампдан реклама ролиги туфайли узр сўради. Роликда АҚШнинг собиқ президенти Роналд Рейган тасвирланган бўлиб, у божларнинг савдо уруши ва иқтисодий фалокатга олиб келиши ҳақида гапирган. Бу ҳақда BBC хабар берди.
Трамп мазкур реклама туфайли Канада товарларига қўшимча 10 фоизлик бож солган. Чунки видео монтаж қилинган бўлиб, Рейган аслида бундай баёнот бермаган. Рейган жамғармаси Канадани “президентнинг аудио ва видеоларини нотўғри контекстда ишлатганликда” айблаган. Реклама дарҳол олиб ташланмагани учун Трамп Канада билан савдо музокараларини тўхтатган.
“Мен президентдан узр сўрадим”, деди Карни Жанубий Кореяда бўлиб ўтган Осиё—Тинч океани иқтисодий ҳамкорлик саммитида журналистларга.
Рекламада Рейганнинг 1987 йилги радио нутқидан парчалар ишлатилган. Унда марҳум президент тарифларнинг Америка иқтисодиётига зарар келтиришини таъкидлаган.
“Бундай савдо тўсиқлари ҳар бир америкалик ишчи ва истеъмолчига зарар етказади”, деган рекламада Рейган.
Карнининг сўзларига кўра, Онтарио провинцияси томонидан молиялаштирилган рекламани “у қилмаган бўларди” ва Трамп бундан “хафа бўлган”. АҚШ президенти Карни узр сўраганини тасдиқлаб, “муносабатларимиз яхши, аммо у қилган иш нотўғри эди”, деган.
Карни реклама учун масъул бўлган Онтарио бош вазири Даг Форд клипни унга олдиндан кўрсатганини, бироқ у Фордга эфирга узатмасликни маслаҳат берганини айтди. Реклама Toronto Blue Jays ва Los Anjeles Dodgers ўртасидаги бейсбол ўйинида эфирга узатилган. Форднинг таъкидлашича, ролик “бир миллиард мартадан ортиқ кўрилган” ва ҳатто Буюк Британия ҳамда Ҳиндистонда ҳам эътибор қозонган.
Реклама АҚШ элчиси Пит Хукстра ва Онтарио савдо вакили Девид Патерсон ўртасида кескин келишмовчиликка сабаб бўлган. Форднинг айтишича, Хукстра “мутлақо номақбул” сўзлар ишлатган ва кейин Патерсондан узр сўрашга мажбур бўлган.
Трамп ҳокимиятга келганидан бери кўплаб давлатларга, жумладан Канадага ҳам, кенг қамровли божлар жорий қилган. АҚШда Канада товарларига 35 фоизлик бож мавжуд, бироқ кўпчилик маҳсулотлар эркин савдо битими бўйича бундан озод қилинган. Шунга қарамай, пўлат ва алюминийга 50 фоиз, автомобилларга 25 фоиз божлар сақланиб қолган.
