Венесуэла муваққат президенти Делси Родригес 25 январь куни қилган чиқишида Вашингтоннинг мамлакат ички сиёсатига аралашувини кескин танқид қилди. Собиқ етакчи Николас Мадуро АҚШ томонидан қўлга олинганидан бери мамлакатни бирлаштиришга урунаётган Родригес илк бор Оқ уйга нисбатан бундай кескин муносабат билдирди. Бу ҳақда CNN хабар берди.
“Венесуэла ўз муаммоларини ўзи ҳал қилсин”
Родригес ўз фикрларини Пуэрто-Ла-Крус шаҳридаги нефтьчилар билан учрашувда айтди. Унинг нутқи Венезолана де Телевисиóн давлат телеканали орқали эфирга узатилди.
“Вашингтоннинг Венесуэла сиёсатчиларига буйруқ беришидан тўйдик. Мамлакатдаги келишмовчиликлар ва ички низоларни Венесуэла сиёсати ҳал қилсин. Республикамиз мамлакатдаги фашизм ва экстремизм оқибатларига қарши курашиш учун жуда юқори бадал тўлади”, деди у.
Мадуронинг собиқ ўринбосари бўлган Делси Родригес АҚШ томонидан қўллаб-қувватланганидан бери босим остида қолмоқда. У бир томондан мамлакат ичидаги Мадуро тарафдорларининг содиқлигини сақлаб қолишга, иккинчи томондан эса Оқ уйни рози қилишга ҳаракат қилмоқда. Янги лавозимга келганига бир ой тўлиши арафасида Родригеснинг Вашингтонга қарши чиқиши АҚШнинг нефть қазиб олишни қайта тиклаш бўйича кетма-кет талаблари фонида юз берди.
Январь ойи бошида Николас Мадуро ва унинг рафиқаси Силия Флорес АҚШ махсус операцияси натижасида қўлга олиниб, Нью Йоркка олиб кетилган эди. АҚШ президенти Дональд Трамп Мадуро қўлга олинганидан сўнг дастлаб Венесуэлани Вашингтон бошқариши ҳақида даъво қилган, бироқ кейинчалик Родригесни муваққат етакчи сифатида қўллаб-қувватлаганди.
Ҳозирда АҚШ маъмурияти Венесуэла олдига бир қатор қатъий талабларни қўймоқда (CNN маълумотига кўра):
- Хитой, Эрон, Россия ва Куба билан алоқаларни узиш;
- нефть қазиб олишда эксклюзив равишда АҚШ билан ҳамкорлик қилиш;
- келажакдаги нефть савдосида АҚШ компанияларига устуворлик бериш.
Нефть — иқтисодиётнинг таянчи
Венесуэла иқтисодиётининг асосий двигательи нефть ҳисобланади. Мамлакат дунёдаги энг йирик ўта оғир хом нефть захираларига эга. Ушбу турдаги нефтьни қайта ишлаш мураккаб ва қиммат бўлса-да, у АҚШдаги заводлар технологиясига тўлиқ мос келади.
Ички бўлиниш давом этмоқда
25 йиллик қарама-қаршиликлардан сўнг Вашингтон Каракасда барқарор ҳокимият ўрнатишга интилмоқда. Бироқ мамлакат ичида вазият ҳамон таранг. Сабаби ҳамон мамлакатда Мадурони қўллаб-қувватловчилар бор. Бундан ташқари, “Мадурочи бўлмаган чавистлар” “марҳум Уго Чавес тарафдорлари” мавжуд бўлиб, улар Мадурони 21-аср социализми идеалларига хиёнат қилганликда айблайди.
