Интернетда Жеффри Эпштейн тирик бўлиши мумкинлиги ҳақидаги назария тарқалди. Бу ҳақда “Primetimer” нашри хабар берди.
Бунга гўёки у билан боғлиқ бўлган Fortnite аккаунтининг фаоллиги сабаб бўлган. Гап littlestjeffi тахаллуси билан очилган профиль ҳақида кетмоқда. Маълумотга кўра, ушбу аккаунт 2019 йилдан кейин Исроил ҳудудида фаол бўлган бўлиши мумкин.
Хабарларга кўра, Эпштейн иши бўйича файлларнинг янгиланган версияларида ушбу фойдаланувчи номининг молиячи билан боғлиқлиги ҳақида эслатмалар мавжуд. Бу боғлиқлик турли рақамли излар, жумладан, YouTube’даги обуналар орқали аниқланган. Интернетдаги қизиқиш кучайганидан сўнг хабарларга кўра, мазкур профиль ёпиқ режимга ўтказилган.
Шу билан бирга, расмий ҳужжатларда Жеффри Эпштейн 2019 йил 10 август куни Нью-Йоркдаги қамоқхонада вафот этгани қайд этилган. Айрим даъволарга кўра, littlestjeffi профилининг мавжудлиги ва сўнгги кунлардаги фаоллиги бу маълумотларга шубҳа уйғотмоқда.
Эпштейн иши бўйича файлларнинг сўнгги янгиланишларида илгари эълон қилинмаган материаллар чоп этилган. Улар орасида Эпштейннинг жасади тасвирланган суратлар, суд-тиббий очиш ҳисоботлари, психологик хулосалар ҳамда қамоқхона ички ҳужжатлари мавжуд.
Таҳлилчиларга кўра, интернетда тарқалган бу даъволар ҳақиқатга яқин эмас, лекин Эпштейннинг эгизаги ҳам бўлиши мумкин. Яна баъзи бирлар қамоқда Эпштейннинг ўзи эмас, унинг қиёфадоши ёки яқин қариндоши ўлганини айтмоқда.
Маълумот учун, Жеффри Эпштейн – америкалик молиячи, инвестиция банкири ва тадбиркор. 2019 йилда у ҳибсга олинган ва вояга етмаганларни жинсий эксплуатация қилиш мақсадида одам савдоси билан шуғулланганликда айбланган. Тергов материалларига кўра, Эпштейн болаларни фоҳишаликка жалб этишнинг бутун бир тизимини яратган.
Шунингдек, ОАВда Жеффри уюштирган махсус ёпиқ кечалар ҳақида маълумотлар тарқалган. Ушбу шов-шувли иш фонида айрим сиёсатчилар ва шоу-бизнес юлдузларининг у билан яқин алоқалари ва можароли тадбирлардаги иштироки ҳақида ҳам хабарлар пайдо бўлган.
Бизнесменга 40 йилдан ортиқ қамоқ жазоси таҳдид қилаётган эди, бироқ ҳибсга олинганидан бир ой ўтиб Эпштейн ўз камерасида ҳушсиз ҳолатда топилган. Кейинчалик у вафот этган. Расмий версияга кўра, Жеффри ўз жонига қасд қилган. Норасмий версияга кўра, у Трампнинг буйруғи билан йўқ қилинган.
Бошқа фойдаланувчилар эса унинг ҳаётлик давридаги ва ўлимидан кейинги суратларини солиштириб, бурун, қулоқ ва қош шакллари бир-биридан фарқ қилади, деган хулосага келишган.
Бундан ташқари, яқинда эълон қилинган ҳужжатларда Нью-Йоркдаги Метрополитен жазони ижро этиш маркази ходимининг хабари ҳам пайдо бўлгани айтилмоқда. Айнан шу қамоқхонада Эпштейн сақланган эди. Қизиғи шундаки, хабар молиячининг вафот этган куни – 2019 йил 10 августда ёзилган. Ходим аноним тарзда қамоқхонага давлат рақамисиз фургон келгани, унга носилкада маҳбус олиб кирилиб, жасад алмаштирилган бўлиши мумкинлигини билдирган.
