Германия ўзининг энг йирик ороли — Рюгендаги суюлтирилган табиий газ терминали орқали Украинага газ етказиб беришни бошлади. Бу ҳақда Украинанинг “Нафтогаз” энергетика компанияси ва Германия томони баёнотига таяниб, Euronews хабар берди.
German Baltic деб номланган мазкур терминал танкерларда олиб келинган суюлтирилган газни (жумладан, АҚШдан келтирилган захираларни) қайта ишлаш ва Германия қувурлар тармоғига йўналтириш билан шуғулланади. Қишки иситиш мавсумида ушбу терминал ўз фаолиятини сезиларли даражада оширди.
Рюген оролидаги терминални бошқарувчи Deutsche ReGas хусусий оператори ҳам ушбу хабарни тасдиқлади.
“Украинанинг энергетика хавфсизлигига бевосита ҳисса қўшаётганимиздан ғоятда фахрланамиз”, деди Deutsche ReGas бош директори Инго Вагнер.
Компаниянинг қайд этишича, Рюгендаги иншоот Германиядаги ягона хусусий молиялаштирилган ва Украинани газ билан таъминлаётган газ терминали ҳисобланади.
Етказиб бериш йўналиши ва стратегик аҳамият
Газ етказиб бериш Польша ҳудуди орқали амалга оширилмоқда ва бу яқин келажакда Украинанинг энергия эҳтиёжларини қоплашга ёрдам бериши кутилмоқда. Инго Вагнернинг сўзларига кўра, бу жараён терминалнинг Марказий ва Шарқий Европа учун стратегик аҳамиятга эга эканлигидан далолат беради.
“Нафтогаз” раҳбари Сергий Корецкий уруш ва аномал совуқ сабабли бу йилги қиш энг оғири бўлганини таъкидлади:
“Газ инфратузилмасига қилинаётган тўхтовсиз ҳужумлар ва ҳаддан ташқари совуқ туфайли ушбу қиш уруш бошланганидан бери энг қийини бўлди. Янги ҳамкорлик жорий йил учун ишончли импорт йўналишини очади. Бу келишув узоқ муддатли шериклик йўлидаги илк қадамдир”, деди Корецкий.
Россия газига муқобил: Германиянинг янги энергетика сиёсати
Россия тўрт йил аввал Украинага кенг кўламли босқинни бошлагач, Европага газ экспортини тўхтатган эди. Шундан сўнг, Германия ва бутун Европа муқобил энергия манбаларини қидиришга тушди.
Ҳозирда Германияда бешта суюлтирилган газ терминали фаолият кўрсатмоқда. Мутахассисларнинг фикрича, суюлтирилган газ терминаллари газни мавжуд қувурлар тузилмасига боғланмаган ҳолда қабул қилиш имконини беради, бу эса таъминот хавфсизлигини кафолатлайди.
Маълумот ўрнида, 2025 йилда Германия импорт қилган жами суюлтирилган газнинг 96 фоизи АҚШ ҳиссасига тўғри келган.
