Тошкент шаҳрида Сурияга бориб, жангарилар гуруҳига қўшилмоқчи бўлган эркак 6 йилга қамалди. Бу ҳақда Давлат хавфсизлик хизмати хабар берди.
Қайд этилишича, Тошкент шаҳрининг Қорақамиш мавзесида яшаган, 2018 йилда Сурияга кетиб, жангари гуруҳларга қўшилган Ҳасан исмли шахс Instagram орқали ёшларни алдаш ва қуролли можароларга жалб қилишга уринган. 30 ёшли М. исмли шахс унинг чақириқларига алданган.
“Бир бола билан салом-алигим бор эди. Ёшлигимда, мактабда таниганман. 2024 йил мобайнида шу диний террористик видеоларни кўриб ишқибоз бўлиб қолдим. Instagram’да гаплашганман, ўша ердалигини айтган. Кейин у мени манашу ердаман деб, таъсир доирасига тушириб қўйди”, дейди эркак.
У оиласи, фарзандлари ва ота-онасини ташлаб, Ҳасаннинг кўрсатмалари билан Қозоғистон орқали Сурияга кетиш режасини тузган. Самолётга чипта олиш учун машинасини ҳам сотишга уринган.
“Туркияга учиб келсанг ўзим кутиб оламан. Олиб кириб кетамиз, деди”, дейди эркак.
У бирга ишлайдиган қариндошларига жангларда қатнашиш фарз экан ҳақида нотўғри маълумотлар берган ва уларни ҳам Сурияга кетишга чақирган. Ҳуқуқни муҳофаза қилувчи органлар тўрт қариндош йигитни қўлга олган ва улар диний экстремизм мазмунидаги маърузаларни тинглагани аниқланган.
Эркак Жиноят кодексининг 156-моддаси (миллий, ирқий, этник ёки диний адоват қўзғатиш) 2-қисми ва 244-2-моддасининг (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) 1-қисмида назарда тутилган жиноятларни содир этганликда айбдор деб топилган. Унга тайинланган жазоларни қисман қўшиш йўли билан узил-кесил ўташ учун 6 йил озодликдан маҳрум қилиш жазоси тайинланган. Унинг шерикларига ҳам қонуний чора кўрилиши белгиланган.
