Фарғона вилоятида мансабдор шахслар пора билан ушланди. Бу ҳақда Давлат хавфсизлик хизмати хабар берди.
Қайд этилишича, дастлабки суриштирув жараёнида кадастр агентлиги бош инспектори фуқаронинг яшаш ҳудудида қўшимча ер майдони қўшиб олингани ва у ўзбошимчалик эгаллаб олинган ерда қурилиш қилгани учун 84 млн сўм жарима солинишини билдирган. Шундан сўнг, бош инспектор фуқарога бу вазиятдан осон қутулиш йўлини кўрсатиб, унга жарима қўлламаслик ҳамда ерни қонунийлаштириб бериш эвазига 400 АҚШ доллари талаб қилган.
ДХХнинг Фарғона вилояти бўйича бошқармаси ҳамда бошқа ҳуқуқ-тартибот идоралари ҳамкорлигида фуқаро аризаси асосида ўтказилган тезкор тадбирда бош инспектор талаб қилинган маблағни ўз хизмат жойи биноси олдида олган вақтида ашёвий далиллар билан ушланган.
Шунингдек, яна бир ҳолатда қурилиш фаолияти билан шуғулланувчи хусусий корхона 2025 йилнинг октябрь ойида «Фарғона сув қурилиш инвест» давлат муассасасининг маъмурий биносида 850 млн сўмлик мукаммал таъмирлаш ишларини амалга ошириш учун ўтказилган шаффоф тендер танловида ғолиб чиққан, бироқ ушбу давлат муассасаси бош муҳандиси ва бошқалар ўзаро тил бириктириб, хусусий корхонада мукаммал таъмирлаш ишларини бошлаш учун рухсат бериш эвазига хусусий корхона раҳбаридан 5500 АҚШ доллари талаб қилган.
Мазкур ҳолат бўйича ўтказилган тезкор тадбирда юқоридаги шахслар 5 минг АҚШ долларини олган вақтида ушланган.
Айни пайтда мазкур ҳолатлар юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
