Наманган вилоятида Қурилиш ва уй-жой коммунал хўжалиги бош бошқармасининг икки нафар бош мутахассиси ноқонуний фаолият эвазига 22 минг доллар талаб қилди. Бу ҳақда Давлат хавфсизлик хизмати хабар берди.
Маълум қилинишича, бош мутахассислар ўзаро тил бириктириб, маҳаллий тадбиркорга тегишли бўлган, Янги Наманган туманида жойлашган 2 қаватли нотурар бинонинг қурилиш рухсатномаси, архитектура-режалаштириш топшириғи ва лойиҳа ҳужжатларини ижобий ҳал қилиб бериш эвазига 22 минг доллар талаб қилиб, жорий йилнинг март ойида 7 минг доллар олган.
Давлат хавфсизлик хизмати ходимлари томонидан Бош прокуратура ҳузуридаги департамент билан ҳамкорликда ўтказилган тезкор тадбирда улардан бири қолган 15 минг долларни олган вақтида ашёвий далиллар билан ушланган. Шунингдек, иккинчи бош мутахассис ҳам процессуал тартибда қўлга олинган.
Билдирилишича, ҳозирда уларга нисбатан жиноят иши қўзғатилиб, тергов ҳаракатлари олиб борилмоқда.
