Наманган вилоятининг Чуст тумани, “Зарафшон” МФЙ ҳудудида жойлашган 10 гектар ерда 29 ноябрь куни чиқинди ёқиш заводига тамал тоши қўйилиб, қурилиш жараёнларига старт берилди. Бу ҳақда Чиқиндиларни бошқариш ва циркуляр иқтисодиётни ривожлантириш агентлиги хабар берди.
Лойиҳа Everbright Environmental Energy Namangan МЧЖ ХК томонидан хитойлик инвесторлар билан ҳамкорликда амалга оширилади.
Наманган ҳокимлиги матбуот хизматининг маълум қилишича, мазкур лойиҳа ишга тушиши ҳисобига 547,5 минг тонна чиқинди қайта ишланади, 310 млн кВт/соат электр энергияси ишлаб чиқарилади. Шундан 254 млн кВт/соати тармоққа узатилади. Бу тахминан 300 минг аҳолининг йиллик электр энергияга бўлган эҳтиёжини қоплайди. Янги лойиҳа натижасида 180 нафар фуқаронинг доимий бандлиги таъминланади.
Вилоятда 1 кунда ўртача 1450 тонна, йиллик 529,3 минг тонна чиқиндилар тўпланиб, тўлиқ қайта ишлаш имконияти яратилмоқда. Биринчи босқичда 6 та туманлардан йиғилган чиқиндилар Тўрақўрғон туманидаги қайта юклаш станциясига келтирилиб, сараланади ва ушбу заводга олиб келинади.
Инвестор томонидан 2027-йилда лойиҳанинг ишга туширилиши таъминланади. Электр энергиясини сотиб олиш ва қаттиқ маиший чиқиндиларни етказиб бериш тўғрисидаги битимларга мувофиқ лойиҳа компания ишлаб чиқарган электр энергиясини 30 йил давомида “Ўзенергосотиш” АЖга кафолатланган тарзда сотади.
Ўзбекистонда чиқиндидан электр энергияси ишлаб чиқариш мажмуалари қурилиши
Қаттиқ маиший чиқиндиларни ёқиш орқали электр энергияси ишлаб чиқариш инвестиция лойиҳаларини амалга ошириш чора-тадбирлари тўғрисида президентнинг 2024 йил 24 мартдаги қарори қабул қилинган эди.
Жами 9 та ҳудудда — Тошкент, Андижон, Наманган, Фарғона, Қашқадарё, Самарқанд, Бухоро, Жиззах ва Қорақалпоғистон Республикасида чиқиндиларни термик қайта ишлаш орқали электр энергияси ишлаб чиқариш мажмуаларини қуриш режалаштирилган. Корхоналар лойиҳалари 2024 йил октябрь ойида давлат раҳбарига тақдим этилган.
2025-йилда бир вақтнинг ўзида учта чиқинди ёқиш заводининг қурилиши бошланди. Ушбу лойиҳалар Андижонда China International Cаmcе билан ҳамкорликда, Самарқандда Shanghai SUS Environment иштирокида ҳамда Фарғонада China Everbright International компанияси томонидан амалга оширилмоқда.
