Наманган шаҳрида 31 май куни бир гуруҳ эркаклар қарз сабаб 21 ёшли йигитни “самосуд” қилди. Ҳолат вилоят ИИБ томонидан ўрганилди.
Қайд этилишича, воқеа “Даштбоғ” маҳалласи ҳудудида содир бўлган.
Янги Наманган туманида яшовчи 1990-йилда туғилган Н.X., 2000 йилда туғилган Н.А., 2000 йилда туғилган О.А. ҳамда 2007 йилда туғилган А.А. Наманган шаҳрида яшовчи 2005-йилда туғилган И.А. билан қарз масаласида тортишиб қолган.
ИИБ ахборотига кўра, жанжал давомида ушбу шахслар И.А.ни бир гуруҳ бўлиб уриб-дўппослаган ва унга енгил тан жароҳати етказган.
Терговга қадар текширув жараёнида ҳодисанинг барча иштирокчилари шахси аниқланган. Мазкур ҳолат юзасидан Наманган шаҳар ИИБ ҳузуридаги Тергов бўлими томонидан Н.X., Н.А., О.А. ва А.А.га нисбатан Жиноят кодексининг 277-моддаси (безорилик) 2-қисми “б” банди билан жиноят иши қўзғатилган.
Ҳозирда мазкур жиноят иши доирасида дастлабки тергов ҳаракатлари олиб борилмоқда.
