Хоразмда пулфуруш 3800 АҚШ долларини маълум қийматда ноқонуний тарзда ўзбек сўмига алмаштириб бераётганида қўлга олинди. Бу ҳақда Ички ишлар вазирлиги хабар берди.
Маълум қилинишича, жорий йилнинг 1 июль куни Хоразм вилояти ИИБ Тезкор-қидирув хизмати ҳамда ДХХ вилоят бошқармаси ходимлари томонидан Янгиариқ тумани ҳудудида ўтказилган тезкор-қидирув тадбири давомида ноқонуний валюта айирбошлаш билан боғлиқ ҳолат аниқланган.
Тадбир давомида Янгиариқ туманида яшовчи 1994 йилда туғилган шахс, Хонқа туманида яшовчи 1984 йилда туғилган танишидан 3800 АҚШ долларини, ҳар бир АҚШ доллари учун 12 минг сўм ҳисобида, жами 45 миллион 600 минг сўм пул маблағини танишининг банк пластик картасига ўтказиб берган пайтида, ашёвий далиллар билан жиноят устида ушланган. Тезкор тадбир давомида пул маблағлари ва бошқа ашёвий далиллар белгиланган тартибда расмийлаштириб олинган.
Билдирилишича, мазкур ҳолат юзасидан Жиноят кодексининг 177-моддасига (валюта қимматликларини, қимматбаҳо металлар ва (ёки) қимматбаҳо тошларни қонунга хилоф равишда олиш ёки ўтказиш) асосан жиноят иши қўзғатилиб, дастлабки тергов ҳаракатлари олиб борилмоқда.
