Британия империяси ва Ҳамдўстлиги тарихи билан боғлиқ 600 дан ортиқ артефакт Бристол музейидан ўғирлаб кетилди. Полиция тўрт нафар гумонланувчини қидириш ишларини бошлаган. Бу ҳақда Al Jazeera хабар берди.
“Муҳим маданий қийматга эга” деб таърифланган буюмлар 25 сентябрь куни эрта тонгда музей омборидан олиб кетилган. Полиция маълумот нега икки ойдан ортиқ вақт ўтиб эълон қилинаётганига изоҳ бермади. Ўғирланган коллекция медаллар, нишонлар, тўғноғичлар, заргарлик буюмлари, ўйилган фил суяги, кумуш идишлар, бронза фигуралар ва геологик намуналарни ўз ичига олади.
Бристол шаҳар кенгашининг маданият ва ижодий саноат бўйича раҳбари Филипп Уокернинг айтишича, буюмлар Британиянинг ўз империяси таркибига кирган мамлакатлар билан икки асрдан ортиқ алоқаларини акс эттиради.
“Коллекциялар кўплаб мамлакатлар учун маданий аҳамиятга эга бўлиб, Британия империясига алоқадор ва ундан жабр кўрганларнинг ҳаёти ҳақида бебаҳо маълумот ва тушунча беради”, деди Уокер.
- “Катта йўқотиш”
Терговга раҳбарлик қилаётган детектив Ден Бурган ўғрилик “шаҳар учун катта йўқотиш” эканини қайд этди.
“Ушбу буюмлар, уларнинг аксарияти турли даврларда хусусий шахслар томонидан музейга топширилган бўлиб, Британия тарихининг кўп қатламли бир даврини ёритиб берадиган коллекциянинг бир қисмини ташкил этади. Биз жамоатчилик вакиллари айбдорларни жавобгарликка тортишга ёрдам беришига умид қиламиз”, деди у.
Бристолнинг ўтмиши трансатлантик қул савдоси билан чамбарчас боғлиқ. 1807-йилда савдо бекор қилинишидан олдин шаҳардан сузиб кетаётган кемалар камида ярим миллион африкаликни қулликка олиб кетган. Ушбу тизимдан олинган фойда бугунги кунда Бристол бўйлаб сақланиб қолган нафис грузин меъморчилигини молиялаштиришга ёрдам берди.
Музейнинг кенгроқ коллекцияси Тинч океани оролларидан келтирилган буюмлар, Африка давлатларига оид тарихий кийимлар, шунингдек, фотосуратлар, кинолавҳалар, шахсий ҳужжатлар ва аудиоёзувларни ҳам ўз ичига олади. Музей веб-сайтига кўра, бу буюмлар “тарихнинг мураккаб ва мунозарали давридаги турли хил ҳаёт ҳамда ландшафтлар ҳақида маълумот беради”.
Шаҳар 2020-йилда халқаро миқёсда эътиборни тортди: ирқчиликка қарши намойишчилар XVII аср қул савдогари Эдвард Колстоннинг ҳайкалини ағдариб, Авон дарёсига ташлади. Кейинчалик ҳайкал сувдан олиниб, маҳаллий музейда кўргазмага қўйилди.
