Суриянинг Ҳомс шаҳридаги масжидда 26 декабрь куни жума намозидан сўнг портлаш содир бўлди. Оқибатда камида 6 киши ҳаётдан кўз юмди, 20 дан ортиқ киши жароҳатланди. Бу ҳақда Al Jazeera xабар берди.
Ҳодиса шаҳарнинг Вади ал-Даҳаб мавзесида жойлашган Имом Али бин Аби Толиб масжидида содир этилган. Маҳаллий расмийларнинг Reuters агентлигига маълум қилишича, портлаш худкуш террорчи томонидан амалга оширилган ёки бинога олдиндан портловчи қурилма ўрнатилган бўлиши мумкин. Ҳозирда хавфсизлик кучлари ҳудудни қуршовга олган ва суриштирув ишлари олиб борилмоқда.
Мазҳаблараро низо хавфи
Al Jazeera мухбири Айман Оғаннанинг таъкидлашича, Ҳомс шаҳри аҳолиси турли мазҳаб вакиллари — алавийлар, насронийлар ва сунний мусулмонлардан иборат. Мазкур ҳужум айнан алавийлар масжидига қаратилгани мамлакатда мазҳаблараро кескинликни янада аланга олдириши мумкинлигидан хавотир билдирилмоқда.
Ҳозирча ҳеч бир гуруҳ ҳужум учун жавобгарликни зиммасига олгани йўқ. Бироқ охирги вақтларда Сурияда ИШИД террорчилик гуруҳи фаоллашгани кузатилмоқда. Хабарда айтилишича, ҳукумат кучлари яқинда Ҳалаб яқинида операция ўтказиб, ИШИДнинг уч нафар аъзосини ҳибсга олган.
Минтақадаги вазият
Ўтган ҳафтада АҚШ ҳарбийлари икки нафар америкалик аскар ва бир нафар таржимоннинг ўлдирилишига жавобан Суриядаги ИШИД нишонларига авиазарбалар йўллаган эди. Дамашқ маъмурияти ҳам ноябрь ойида ИШИДга қарши глобал альянсга қўшилиб, гуруҳнинг қолган вакилларини йўқ қилишга ҳаракат қилмоқда.
Хусусан, мамлакат расмийлари сўнгги бора АҚШ бошчилигидаги халқаро коалиция билан ҳамкорликда ИШИД террорчилик гуруҳининг йирик етакчиларидан бирини йўқ қилганини маълум қилган. Унда ИШИДнинг Суриядаги энг кўзга кўринган етакчиларидан бири ҳисобланган, Абу Омар Шаддод лақаби билан танилган террорчи Муҳаммад Шаҳода ўлдирилган эди.
Бугунги, 26 декабрь кунги, қонли ҳужум эса Дамашқдаги янги ҳукумат назоратни ўрнатишга уринаётган бир пайтда, мамлакатдаги хавфсизлик қанчалик мўрт бўлиб қолаётганини кўрсатмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
