Россия Марказий банки Волга федерал округи рамзлари туширилган, 1000 рубль номинал қийматдаги янгиланган купюрани тақдим этди. У бугун, 26 декабрдан расман муомалага киритилган. Бу ҳақда РБК хабар берди.
Қайд этилишича, банкнота Нижний Новгород va Волга федерал округига бағишланган. Олд томонидаги асосий тасвир – Нижний Новгород Кремлининг Николская минораси. Орқа томонида эса Саратов автомобиль кўприги, “Метеор-120Р” сувусти қанотли кемаси ҳамда Қозондаги Деҳқончилик саройи тасвирланган. Аввалги купюра каби янги банкнота ҳам кўкимтир рангда ишланган.
“Янги банкнота дарҳол муомалага кирмайди. Банклар va савдо-хизмат кўрсатиш корхоналарига банкноталарни қабул қилиш va қайта ишлаш ускуналарини созлаш учун вақт керак бўлади. Бу жараён одатда бир йилдан бир ярим йилгача давом этади”, дейди Россия Марказий банки раиси ўринбосари Сергей Белов.
У, шунингдек, эски купюралар янгилари билан бирга эскиргунига қадар муомалада қолишини қўшимча қилган.
“Банкноталар маълум даврийликда модернизация қилиниши керак. Бу нафақат уларнинг чиройли va замонавий кўриниши учун, балки энг аввало қалбакилаштиришдан ҳимоя даражасини ошириш учун зарур”, дея изоҳлаган Белов янгилаш заруратини.
Бунгача Россия Марказий банки 2022 йилда 100 рубль, 2023 йил октябрида эса 5000 рубль номиналидаги янгиланган банкноталарни чиқарган.
Беловнинг айтишича, янги купюраларда ҳимоя тизими сезиларли даражада кучайтирилган.
“Биз ҳар бир инсон мустақил текшира оладиган элементларни мураккаблаштирдик – банкнотани қиялатганда, қўл билан ушлаганда ёки ёруғликка тутиб кўрганда аниқланадиган белгиларни. Шунингдек, банкоматлар, тўлов терминаллари va бошқа автоматик қурилмалар томонидан ўқиладиган – машина ўқий оладиган ҳимоя белгиларига алоҳида эътибор қаратдик”, дейди Белов.
Қайд этиш жоиз, бу – 1000 рубллик банкнотани чиқаришга иккинчи уриниш. Биринчи уриниш 2023 йилда бўлган. Ўшанда Россия Марказий банки Волга федерал округига бағишланган янги 1000 рубллик купюрани муомалага чиқарган. Аммо банкнотанинг орқа томонидаги дизайн жамоатчиликда кескин баҳс-мунозарага сабаб бўлди. Унда Қозондаги Сююмбике минораси (унинг тепасида ярим ой бор) va ёнида Татар халқининг давлатчилиги тарихи музейи тасвирланган эди. Ушбу музей биноси илгари Сарой черкови бўлган. Муҳим жиҳати шундаки, совет даврида бу бинодан христианлик хочи олиб ташланган, аммо янги банкнотада у қайта тикланмади. Шу сабабли айрим доиралар буни диний рамзларга нисбатан бирёқлама ёндашув деб баҳолади. Айнан шу ҳолат “хоч можароси”га сабаб бўлган va оқибатда Марказий банк банкнотани қайта ишлаб чиқишга мажбур бўлган.
