Англиянинг “Манчестер Юнайтед” жамоаси Жуде Беллингемни ўзининг спорт лойиҳасининг марказий фигураси сифатида кўрмоқда. “Қизил иблислар” ҳозирда “Реал Мадрид” сафида тўп сураётган Англия терма жамоаси ярим ҳимоячиси учун 200 миллион еврогача бўлган таклифни кўриб чиқмоқда. Бу ҳақда “Fichajes” нашри хабар берди.
Манбага кўра, “Манчестер Юнайтед” раҳбарияти “Реал Мадрид” юлдузи учун 200 миллион еврогача бўлган расмий таклиф ва йилига тахминан 15 миллион евро маош таклиф қилишга тайёр. Бироқ қанчалик катта сумма таклиф этилмасин, “Реал Мадрид” Беллингемнинг кетишини муҳокама қилиш ниятида эмас. Испания ОАВларига кўра, мадридликлар мавсум охирида йирик трансферларни амалга ошириши мумкин, бироқ Жуд Беллингем сотиб бўлмайдиган футболчи сифатида баҳоланмоқда.
Манбаларнинг таъкидлашича, инглиз ярим ҳимоячиси Тибо Куртуа, Эдер Милитао, Аурелиэн Тчоуамени ва Килиан Мбаппе билан бирга клубнинг дахлсиз беш футболчиси қаторига киради. Жуде Беллингемнинг ўзи ҳам ҳозирча жамоасини ўзгартириш ниятида эмас. У “Реал Мадрид” сафида совринлар ютишни давом эттиришни истайди ва “Манчестер Юнайтед”нинг таклифини рад этишга тайёр.
Маълумот учун, Беллингем “Реал Мадрид” сафида 120 та расмий ўйинда майдонга тушиб, 43 та гол ва 32 та голли узатма муаллифи бўлган.
