Украина Президенти Влдимир Зеленский халққа мурожаат қилиб, мамлакат ўз тарихидаги энг мураккаб даврни бошидан кечираётганини айтди. У АҚШнинг 28 бандлик тинчлик режасига ишора қилиб, Киев қадр-қиммат ва эркинликни сақлаб қолиш учун курашишини таъкидлади. Бу ҳақда у ўзининг Telegram каналида маълум қилди.
Зеленскийга кўра, Украина ўта мураккаб танлов қаршисида турибди: ё ўз қадр-қимматини йўқотиш, ё асосий ҳамкорни йўқотиш хавфи. Бу ҳолат мураккаб 28 бандлик режани қабул қилиш ёки жуда оғир қишни бошдан кечиришга сабаб бўлади. Президентнинг айтишича, украинлардан аллақачон икки марта ҳужум қилган шахсга ишониш ва жавоб кутиш сўралмоқда.
Тинчлик ва бирлик учун кураш
Зеленский Қўшма Штатлар ва бошқа ҳамкорлар билан хотиржам, аммо тезкорлик билан ишлашини маълум қилди. У, шунингдек, душманга “Украина тинчликни хоҳламайди”, деган гапни айтишга йўл бермаслигини таъкидлади.
Давлат раҳбари ҳар қандай тинчлик режасида иккита асосий нуқта — украиналикларнинг қадр-қиммати ва эркинлиги инобатга олиниши учун кураш олиб боришини таъкидлади. У урушни тугатиш учун ҳамма нарсани қилишини, аммо Украинани, Европани ва глобал тинчликни тугатишга йўл қўймаслигини қўшимча қилди.
“Биз дунёнинг энг йирик армияларидан бирига қарши деярли тўрт йилдан бери жанг қиляпмиз. Халқимиз урушнинг тугашини истайди. Биз пўлатдекмиз, аммо энг кучли металл ҳам синиши мумкин”, деди Зеленский.
Унинг фикрича, душман учун энг даҳшатли нарса бу украиналикларнинг бирлигидир. Президентнинг қайд этишича, ҳозир, қадр-қимматли тинчликка эришиш учун бу бирликка ҳар қачонгидан ҳам кўпроқ эҳтиёж бор.
Келгуси ҳафта қийинчиликлари
Зеленский келгуси ҳафта қийин бўлишидан огоҳлантирди. Унинг сўзларига кўра, бу даврда Украинани бўлиб юбориш учун катта босим бўлади ва душман уларнинг бирон бир натижага эришишига йўл қўймаслик учун ҳамма нарсани ишга солади.
Президент сиёсатчилар ва фуқароларни жанжаллар ва сиёсий ўйинларни тўхтатиб, бирлашишга чақирди. Зеленский халқ унинг ортида турганини билса, тинчликка эришиш осонроқ бўлишини билдирди. У якунда ўзининг ёлғиз эмаслигига ишонишини ва буни билишини таъкидлаб, мурожаатини якунлади.
