Украина президенти Владимир Зеленский учинчи жаҳон уруши аллақачон бошланганини айтди ва мамлакат Россия билан урушда ғалаба қозонишини таъкидлади. Бу ҳақда у BBC’га берган интервьюсида маълум қилди.
Зеленский суҳбат давомида Донбасс масаласига ҳам тўхталди. Хусусан, Россия ўн минглаб аскарини йўқотганига қарамай тўлиқ эгаллай олмаган бу ҳудудлардан Украина қўшинлари чиқмаслигини айтди. У Путиннинг талаб қилаётган ўт очишни тўхтатиш битими эвазига ҳудудий ён беришга қаршилигини таъкидлади.
Зеленскийга кўра, Путин аллақачон учинчи жаҳон урушини бошлаб юборган ва уни тўхтатишнинг ягона йўли — кучли ҳарбий ҳамда иқтисодий босим ўтказиб, уни ортга чекинишга мажбур қилишдир.
Менимча, Путин уни (учинчи жаҳон урушини) аллақачон бошлаган. Масала шундаки, у қанча ҳудудни эгаллай олади ва уни қандай тўхтатиш мумкин… Россия дунёга бошқача турмуш тарзини мажбуран сингдирмоқчи ва одамлар ўзи учун танлаган ҳаётни ўзгартирмоқчи, деди у.
Ҳозирда Россия Донецк вилоятининг қарийб 20 фоизини назорат қилмоқда, бироқ тинчлик битими доирасида бутун ҳудудни талаб қилмоқда. Зеленский эса урушни ҳозирги фронт чизиғида “музлатиш”ни илгари сурган. У Донецк, Херсон ва Запорожье вилоятларининг бир қисмини Россияга топшириш мутлақо қабул қилиб бўлмаслигини айтган.
Мен бу ҳудудларга оддий ер сифатида қарамайман. Мен буни ўз позициямизни заифлаштириш, у ерда яшовчи юз минглаб одамларимизни ташлаб кетиш деб биламан. Бу “чекиниш“ жамиятимизни бўлиб юборишимизга ишончим комил, деди у.
Зеленский ҳудудий ён бериш Путинни келажакда урушни қайта бошлашдан тўхтатмаслигини ҳам таъкидлади. Унинг фикрича, Россия президенти бундай танаффусдан куч тўплаш учун фойдаланади.
Эҳтимол, бу Путинни бир мунча вақт қониқтирар… унга пауза керак… аммо у тикланиб олгач, европалик ҳамкорларимиз бу уч-беш йил давом этиши мумкинлигини айтмоқда. Менимча, у бир-икки йилдан кейин тикланиб олиши мумкин. Кейин у қаерни кўзлайди? Биз билмаймиз, лекин унинг (урушни) давом эттиришни хоҳлаши факт, деди Украина раҳбари.
АҚШ президенти Дональд Трамп Женевада ўт очишни тўхтатиш бўйича сўнгги музокаралар арафасида “Украина тезроқ столга ўтиргани маъқул”, деган эди. У Россияга нисбатан эмас, Украинага кўпроқ босим ўтказаётгани айтилмоқда. BBC журналисти Зеленскийдан АҚШ президенти бу борада қанчалик ҳақли эканини сўради.
Ҳозир сиз Киевдасиз, ватанимиз пойтахтидасиз, Украинадасиз. Бунинг учун жуда миннатдорман. Ютқазамизми? Албатта, йўқ, чунки биз Украина мустақиллиги учун курашмоқдамиз, дея жавоб берди Украина раҳбари журналистга.
