Бугун, 2 июнга ўтар кечаси Россия Украинанинг Киев ва Днепр шаҳарларига кенг кўламли ҳужум уюштирди. Оқибатда 16 киши ҳалок бўлди, юзлаб одамлар жароҳатланди. Бу ҳақда РБК Украина хабар берди.
Қайд этилишича, Днепрдаги қурбонлар орасида камида икки нафар бола бор: 2023 йилда туғилган ўғил бола (3 ёшли) ва 8 ёшли бола. 42 киши, жумладан, тўрт нафар бола жароҳатланган. 20 дан ортиқ жабрланувчи парчалардан бўлган жароҳатлар, синиқлар ва мина-портлаш жароҳатлари билан шифохонага ётқизилган. Қидирув-қутқарув операцияси давом этмоқда.
Днепрда кўп квартирали уйлар, корхона, ўт ўчириш қисми, гаражлар ва автомобилларга жиддий шикаст етган. Оммавий зарба Украинанинг бошқа ҳудудларига ҳам тўғри келган.
Киев мэри Виталий Кличконинг маълумотларига кўра, ракеталардан бири Подольск туманидаги 9 қаватли турар жой биносига бориб тушган ва юқори қаватларни қисман вайрон қилган. Бошқа бир ракетанинг парчалари кўп қаватли уйнинг томига тушиб, ёнғин келтириб чиқарган. Шунингдек, Соломенский, Святошинский ва Шевченко туманларидаги уйлар ҳам шикастланган. Пойтахтга қилинган ҳужум туфайли олти киши ҳалок бўлган, 64 киши жароҳатланган, улардан икки нафари болалар.
Харьков мэр Игорь Тереховнинг сўзларига кўра, тўртта туманда зарбалар қайд этилган: турар жой биноси шикастланган, камида 10 киши жабрланган. Киев вилоятида ҳам турар жой бинолари шикастланган, у ерда уч киши жароҳат олган.
