Россия ва Эрон вакиллари БМТнинг Космосдан тинч мақсадларда фойдаланиш қўмитаси конференциясида Илон Маскка тегишли SpaceX компаниясининг Starlink сунъий йўлдош тармоғини “халқаро ҳуқуқни бузишда” айблади. Бу ҳақда Bloomberg маълумотларига таяниб The Моscоw Times хабар берди.
Давлатларнинг таъкидлашича, ушбу тизим фаолияти “тижорий ва ҳарбий технологиялар ўртасидаги чегарани йўқ қилиб юбормоқда”. Россия делегацияси 1967 йилги Космос тўғрисидаги шартнома талаблари бузилиши мумкинлигини билдирган. Мазкур шартномага кўра, давлатлар космик фаолиятда бошқа иштирокчиларнинг манфаатларини ҳам инобатга олиши керак. Россия янги сунъий йўлдошлар сонини чеклаш ва тижорий сунъий йўлдош частоталарини ҳарбий мақсадларда қўллаш қоидаларини аниқлаштиришга қаратилган халқаро музокаралар ўтказишни талаб қилди.
Эрон вакиллари эса Starlink’нинг мамлакат ҳудудида “ноқонуний эксплуатация қилиниши” мамлакат суверенитетини бузаётганини билдирди. Теҳрон тижорий сунъий йўлдош миллий ҳокимият рухсатисиз ҳарбий мақсадларда қўлланаётганини таъкидлади. Эрондаги норозилик намойишлари пайтида интернет узилиб қўйилгани сабабли Илон Маск у ерда Starlink интернетини ишга туширганди.
