Ўзбекистонда божхона органлари томонидан қанча наркотик ва психотроп моддалар аниқлангани маълум қилинди.
Қайд этилишича, жорий йилнинг ўтган даврида 1,6 тонна гиёҳвандлик воситалари аниқланган бўлиб, бу кўрсаткич ўтган йилнинг мос даврига нисбатан 1,6 баробарга ошган. Шунингдек, ўтган йилнинг шу даврига нисбатан 3,7 баробарга кўпроқ, яъни 1 тонна психотроп ва кучли таъсир этувчи моддалар топилган.
Масъулларга нарколабораторияларни аниқлаш ишларини кучайтириш, наркотикни интернет ва ижтимоий тармоқлар орқали сотилишига қарши кураш ҳамда уларнинг ноқонуний айланмасига алоқадор барча шахсларни топиш вазифаси юклатилди.
Қашқадарё вилояти Чироқчи туманида ўтказилган тезкор тадбир чоғида фуқаронинг яшаш хонадонидан 20 килограмм 658 грамм марихуана топилгани хабар қилинганди.
Бошқа бир ҳолатда эса, Наманганда 3,2 миллиард сўмлик контрафакт дорилар ва психотроп моддалар аниқланган. Бунда Қирғизистондан айланма йўллар орқали Янгиқўрғон туманига контрабанда қилинган 24122 дона “Регапен” ва 4880 дона “Тропикамид” психотроп моддалари ҳамда 45 турдаги жами 61287 дона контрафакт дориларни қабул қилиб олган шахс қўлга тушган.
Шу билан бирга, Ўзбекистонда наркожиноий уюшма ташкил қилганлар 20 йилгача қамалиши билдирилганди.
