Германияда оқова сув намуналарида ёввойи полиомиелит вируси (WPV1) аниқланди. Бу ҳақда Роберт Кох институтига таяниб, Reuters хабар берди.
Полиомиелит билан касалланишнинг сўнгги ҳолати мамлакатда 30 йилдан кўпроқ вақт олдин қайд этилган. 2021 йилдан бошлаб Германияда атроф-муҳитдаги сув намуналарида полиовирус бор-йўқлигини аниқлаш бўйича мониторинг йўлга қўйилган. Вирус айнан шу мониторинг доирасида аниқланди.
Жаҳон соғлиқни сақлаш ташкилоти маълумотларига кўра, бу Европада 2007 йилдан бери биринчи марта ёввойи полиовирус аниқланган ҳолатдир. Ўшанда вирус Швейцарияда қайд этилган эди. Ҳеч бир мамлакат полиомиелит билан касалланиш ҳолатларидан суғурталанмаган. Аммо Германияда касалликнинг тарқалиш хавфи эмлашнинг юқори даражаси туфайли жуда паст ҳисобланади.
Полиомиелит вирусли инфекция бўлиб, ўлимга ёки фалажликка олиб келиши мумкин. Болаларни оммавий эмлаш туфайли 1988 йилдан бери касалланиш ҳолатлари 99 фоизга камайган. Ҳозирги вақтда ёввойи полиовирус дунёнинг фақат икки мамлакатида: Покистон ва Афғонистонда эндемикдир. Вакцина ҳосил қилган полиовирус эса кўпроқ мамлакатларда учрайди. Канализация сувларини полиовирусга тестдан ўтказиш вируснинг ҳар икки шаклини аниқлашда жаҳон бўйича қўлланадиган кузатув усулидир.
