Америка қўшинлари ҳарбий операция бошланганидан бери Эрон ҳудудидаги 11 мингдан ортиқ нишонни йўқ қилди. Бу ҳақда 29 март куни АҚШ Қуролли Кучларининг Яқин Шарқдаги Марказий қўмондонлиги (CENTCOM) маълум қилди.
Қўмондонлик маълумотларига кўра, зарба берилган объектлар орасида Эроннинг 150 дан ортиқ ҳарбий кемалари бор бўлиб, улар йўқ қилинган ёки шикастланган.
Операцияга турли куч ва воситалар, жумладан, қирувчи самолётлар, стратегик бомбардимончилар, авиаташувчи кема, ракета эсминецлари, сувости кемалари, шунингдек, Patriot зенит-ракета мажмуалари ва THAAD ракетага қарши мудофаа тизимлари жалб этилган.
CENTCOM қўшимча қилишича, Америка қўшинларининг асосий саъй-ҳаракатлари баллистик ракеталар, дронлар, ҳарбий-денгиз таҳдидлари ва Эрон ҳарбий-саноат базаси элементларини йўқ қилишга қаратилган.
