Бухоро вилоятнинг Когон шаҳридаги кўпқаватли уйда юз берган ёнғиндан 3 нафар фуқаро қутқарилди. Бу ҳақда Фавқулодда вазиятлар вазирлиги матбуот хизмати хабар берди.
Маълум қилинишича, 15 июль куни соат 03:38 да 112 ягона диспетчерлик хизматига Когон шаҳри Турон кўчасидаги кўпқаватли уйда хонадон ёнаётгани ҳақида хабар келиб тушган. ФВВ қутқарув бўлинмалари зудлик билан ҳодиса жойига етиб бориб, ёнғин соат 03:46 да ўраб олинган ва соат 04:40 да тўлиқ бартараф этилган.
Қутқарувчилар ёнғин содир бўлган хонадондан 3 нафар фуқарони соғ-саломат қутқарган. Шунингдек, ёнғиннинг қўшни уйларга тарқалиши хавфи инобатга олинган ҳолда 7 нафар қўшни фуқаро хавфсиз ҳудудга эвакуация қилинган.
Ёнғин оқибатида хонадоннинг тахминан 50 квадрат метр майдонида пол қисми, деворлар ҳамда уй ичидаги айрим жиҳозлар ёнган. Қутқарувчиларнинг саъй-ҳаракатлари туфайли тахминан 650 квадрат метр майдон ва ёнғин тарқалиши мумкин бўлган қўшни уй-жойлар сақлаб қолинган.
Ҳодиса оқибатида тан жароҳати олганлар йўқ. Айни вақтда ёнғиннинг келиб чиқиш сабаби ва етказилган моддий зарар миқдори аниқланмоқда.
