Хитойлик олимлар дунёда биринчи марта кўмир билан ишлайдиган ва карбонат ангидрид гази чиқармайдиган батарея яратди. Бу ҳақда The Independent хабар берди.
Кўмирдан электр энергия олишнинг анъанавий усуллари ҳавони жуда кўп ифлослантиради ва катта миқдорда карбонат ангидрид чиқаради. Сўнгги 10 йил ичида Париж иқлим келишуви глобал миқёсда қўллаб-қувватланмоқда. Шу сабабли ривожланаётган давлатлар тоза ва нол эмиссияли технологияларни қидирмоқда.
Шенжен университети олимлари яратган янги қурилма ZC-DCFC (нол эмиссияли тўғридан тўғри кўмир ёқилғиси элементи) деб аталади. Бунда кўмир ёқилмайди. Бунинг ўрнига дастлаб кўмир майдаланади ва қуритилади.
Махсус ишлов берилгач, у батареянинг анод камерасига юборилади. Сўнгра қурилманинг катодига кислород берилади. Натижада оксидли мембрана орқали кўмирнинг электрокимёвий оксидланиши содир бўлади.
Реакция давомида ҳосил бўлган карбонат ангидрид гази тизимнинг ўзида тутиб қолинади. Сўнгра у синтез-газ каби қимматбаҳо кимёвий хом ашёларга айлантирилади.
Юқори самарадорлик ва чидамлилик
Олимларнинг таъкидлашича, ушбу батарея 40 фоизгача самарадорлик билан энергия ишлаб чиқара олади. Energy Reviews журналида чоп этилган тадқиқотга кўра, қурилмада ёниш жараёни бўлмагани учун энергия йўқотиш кам бўлади.
Аввалги шундай моделларда иш муддати қисқа ва қувват зичлиги паст эди. Янги дизайн эса ушбу муаммоларни ҳал қилди. Уни катта ҳажмдаги блокларга айлантириш мумкин ва у кўмирни энергияга айлантиришда юқори самарадорликка эга. Ҳозирда дунё бўйлаб ер юзасига яқин кўмир захиралари камайиб бормоқда. Кўмир эндиликда 2000 метрдан чуқурроқ жойлардан қазиб олинмоқда.
Тадқиқотчилар ушбу янги технологияни тўғридан тўғри ўша чуқур геологик муҳитларда электр энергияси олиш учун қўллашни таклиф қилмоқда. Бу кўмирни анъанавий қазиб олинадиган ёқилғидан самарали ва тоза энергия манбаига айлантириши кутилмоқда.
Кубада механик автомобилини кўмирда юришга мослаштирди
Кубалик 56 ёшли механик Хуан Карлос Пино АҚШнинг иқтисодий санкциялари туфайли юзага келган ўткир ёнилғи танқислигига қарши ўзига хос ечим топди. Билими 8-синф даражасидаги ихтирочи ўзининг 1980 йилда ишлаб чиқарилган Fiat Polski автомобилини бензин ўрнига кўмирда ҳаракатланадиган қилиб қайта жиҳозлади.
Агуакате шаҳарчасида яшовчи Пино қурилмани бутунлай чиқинди ва иккиламчи буюмлардан йиғган. Январь ойида Вашингтон оролга нефть етказиб беришни тўхтатиб қўйганидан сўнг, кўмир бензиндан кўра анча арзон ва топиш осон бўлган ёқилғига айланди.
