Хитой ҳукумати 1 майдан бошлаб Африканинг 53 мамлакатидан келтирилаётган маҳсулотларга божхона тўловларини бекор қилишини эълон қилди. Бу ҳақда ХХР раиси Си Цзиньпин маълум қилди.
“Хитой 2026 йил 1 майдан бошлаб ўзи билан дипломатик муносабатлар ўрнатган барча 53 та Африка мамлакати учун нол тариф жорий этиш бўйича чора-тадбирларни тўлиқ амалга оширади”, деб таъкидланди Си Цзиньпин.
ХХР раиси таъкидлашича, шу билан бир вақтда Пекин Африка маҳсулотларининг Хитой бозорига киришини ривожлантириш ва кенгайтириш мақсадида кенг қамровли иқтисодий ҳамкорлик тўғрисидаги битим бўйича музокараларни илгари суришни режалаштирмоқда. У Африка товарлари учун “яшил йўлак” фаолиятини такомиллаштиришга ваъда берган.
ХХР Бош божхона бошқармаси маълумотларига кўра, Хитойнинг Африка мамлакатлари билан товар айланмаси 2025 йилда 17,7 фоизга ўсиб, 348,05 миллиард долларни ташкил этган.
Хитойдан экспорт 25,8 фоизга ошиб, 225,03 миллиард долларга, Африкадан импорт эса 5,4 фоизга кўтарилиб, 123,02 миллиард долларга етган.
