Хитойда ишлаб чиқарилган Geely Galaxy V900 гибрид минивени 42 кишини сиғдира олган автоулов сифатида Гиннеснинг рекордлар китобига киритилди.
Қайд этилишича, ушбу модел салон кенглиги бўйича энг яхши кўрсаткичларга эга. Салон ҳажми 8,41 квадрат метрни, ундан фойдаланиш коэффициенти 91,8 фоизни ташкил этади.
Рекорд 27 октябрь куни қайд этилди. Ўша куни минивенга 42 нафар раққоса жойлаштирилган. Компания ушбу рекорд акс этган видеони модел сотуви бошланишидан аввал, яъни 27 ноябрь куни эълон қилди.
Geely Galaxy V900 минивенига 161 от кучига эга 1,5 литрли двигатель-генератор ўрнатилган. Модель 43,3 киловаттли ва 50 киловаттли икки турдаги аккумуляторда таклиф этилмоқда. Автомобиль аккумулятор турига мос равишда 100 фоиз қувват билан 165 ёки 202 километр масофани босиб ўтади. Автомобилнинг ёнилғи сарфи 100 километрга 7-7,2 литрни ташкил этади. Ишлаб чиқарувчи компания ҳозирча электрмоторнинг бошқа характеристикаси ва унинг нархи ҳақидаги маълумотларни ошкор қилмаган.
