Жорий йилнинг 28 ноябрь куни Янги Зеландияда полиция 19,2 минг доллар турадиган Феберже тухум-кулонини ютиб юборганликда гумонланган эркакни қўлга олди. Ҳодиса Окленд марказидаги заргарлик дўконида юз берган. Бу ҳақда “The Guardian” хабар берди.
Partridge Jewellers заргарлик дўкони ходимлари 32 ёшли эркакни Faberge х 007 коллекциясига мансуб Octopussy медалёнини ўғирлашда гумон қилган. Уларнинг айтишича, ташриф буюрувчи тақинчоқни олиб, уни ютиб юборган. Кулон 18 каратли олтиндан ясалган, яшил гильош эмали билан қопланган ҳамда 60 дона оқ бриллиант ва 15 дона кўк сафир билан безатилган. Ичида 18 каратли олтиндан ишланган, кўзлари қора бриллиантлардан тайёрланган миниатюрали саккизоёқ мавжуд.
Faberge х 007 коллекцияси 1983 йилда суратга олинган Жеймс Бонд ҳақидаги “Саккизоёқ” фильми асосида яратилган бўлиб, унда Феберже тухумининг ўғирланиши сюжетнинг асосий қисмига айланган.
Окленднинг марказий тумани полиция бошлиғи Грея Андерсоннинг айтишича, патруль гуруҳи ҳодисадан бир неча дақиқадан сўнг воқеа жойига етиб борган ва эркакни бевосита дўконда қўлга олган. Грея Андерсоннинг сўзларига кўра, тақинчоқ “ҳали топилмаган”.
Эркакка шу дўкондан 12 ноябрь куни iPad ўғирлаганлик айблови ҳам қўйилган. Бундан ташқари, у хусусий уйидан 100 долларлик мушук қумиги ва бургаларга қарши восита ўғирлаганликда ҳам гумонланмоқда. Гумонланувчи ҳибсга олинган. Унинг иши бўйича суд мажлиси 8 декабрь куни округ судида бўлиб ўтади.
