Хитой олимлари Ер билан тўқнашувнинг олдини олиш учун йирик астероид ичига ядровий қурилмани жойлаштириш ва уни портлатиш усулини таклиф қилди. Бу ҳақда The Independent хабар берди.
Сўнгги йилларда Ер яқинидан учиб ўтадиган астероидлар мунтазам равишда аниқламоқда. Бироқ ҳали кашф этилмаган йирик космик жисмлар ҳам мавжуд. Хитойнинг Учириш аппаратлари технологиялари академияси олимлари фикрича, бундай астероидларни йўқ қилиш ёки уларни узоқлаштиришнинг энг самарали усули — ядровий портлатишдир.
Ер билан тўқнашув хавфи ҳақида кеч хабар топилган ҳолатларда бу ягона самарали ечим бўлиши мумкин. Янги тадқиқотда олимлар Ерга яқин йирик астероидни портлатишнинг янги ёндашувини таклиф этди. Унга кўра, космик кема аввал астероид юзасида чуқур кратер ҳосил қилади, сўнг ядровий заряд айнан шу кратер ичига жойлаштирилиб портлатилади.
Тадқиқотчилар турли қувват ва чуқурликдаги ядровий портлашларнинг астероидларга таъсирини баҳолади. Ҳисоб-китобларга кўра, 200 та Хиросима бомбасининг қувватига тенг портлаш диаметри тахминан 100 метр бўлган астероидни бутунлай парчалаб ташлаши мумкин.
Шунингдек, бомбани астероид ичига тахминан 30 метр чуқурликка жойлаштириш уни сиртида портлатишга қараганда анча самаралироқ экани аниқланган. Диаметри бир километр бўлган астероид ичида 20 метр чуқурликда амалга оширилган портлаш унинг Ердан узоқлашишига ёрдам бериб, тезлигини секундига 30 сантиметрдан ортиққа ошириши мумкин.
