Ўзбекистонда эндиликда my.gov.uz портали орқали мобиль телефон рақамини бошқа шахс номига онлайн тарзда расмийлаштириш мумкин. Бу ҳақда портал Telegram-каналида хабар берилди.
Янги тизимга кўра, ариза юборишда рақамнинг амалдаги эгаси ва янги эгаси уни MyID тизими орқали тасдиқлаши керак бўлади. Ушбу хизматнинг нархи мобиль операторнинг тариф сиёсатига қараб ўзгаради.
Авваллари ушбу жараённи амалга ошириш учун ҳар икки томон, яъни рақамни топширувчи ва қабул қилувчи шахс алоқа оператори хизмат кўрсатиш марказига шахсан бориши, навбат кутиши, икки томондан ҳам шахсни тасдиқловчи ҳужжатни (паспорт ёки ID карта) тақдим этилиши ҳамда тегишли ҳужжатларни имзолаши талаб қилинган.
