Қозоғистон Қостанай вилоятида атом электр станциясини қуриш имкониятини кўриб чиқмоқда. Бу ҳақда Атом энергияси агентлиги раиси Алмасадам Сатқалиевга таяниб, “Tengrinews.kz” хабар берди.
Унинг сўзларига кўра, мамлакатда энергия таъминоти барқарорлигини таъминлаш учун камида учта, истиқболда эса тўртта атом электр станциясини қуриш режалаштирилмоқда.
Сатқалиев прогноз қилинган энергия баланси, шунингдек, экологик ва сейсмик хавфсизлик талаблари ҳисобга олинган ҳолда бир қатор салоҳиятли майдонлар аллақачон ўрганилганини билдирган.
“Қозоғистонда атом энергетикасини ривожлантириш учун бир нечта ноёб майдонлар мавжуд. Биринчи навбатда, бу Балхаш бўйи ҳудуди бўлиб, у объектив равишда олтитагача йирик энергия блоки қуришга имкон беради. Катта салоҳиятга эга Курчатов бор – бу кичик ёки ўрта қувватли атом реакторларини ривожлантириш учун майдон. Шунингдек, энергия қурилмаларини комбинациялашган режимда ишлатиш тажрибасига эга Ғарбий Қозоғистон ҳам бор”, дейди у.
Агентлик раҳбари мамлакатнинг бошқа ҳудудларига ҳам алоҳида тўхталиб ўтган.
“Энергия балансидан келиб чиқилса, Қостанай узоқ истиқболда – 20-30 йилдан сўнг – Қозоғистонда атом станциясини қуриш учун истиқболли жойга айланиши мумкин”, дейди Сатқалиев.
Шундай қилиб, Қостанай вилояти узоқ муддатли истиқболда АЭС қуриш учун эҳтимолий майдонлардан бири сифатида кўриб чиқилмоқда.
Аввалроқ Қозоғистондаги иккинчи АЭСнинг номи маълум бўлганди.
Маълумот учун, ўтган йилнинг кузида Қозоғистонда биринчи АЭС учун ном танланганди. Танлов комиссиясининг якуний йиғилиши натижаларига кўра, фуқаролардан энг кўп таклиф олган “Балқаш атом электр станцияси” номи ғолиб деб топилган.
Айтиш ўринлики, 2050 йилгача Қозоғистонда камида учта атом электр станциясини (АЭС) ишга тушириш режалаштирилмоқда. Шу билан бирга, тўртинчи станцияни қуриш лойиҳасини амалга ошириш ҳам кўзда тутилган.
2025 йил март ойида Президент Қосим-Жомарт Тўқаев Миллий қурултой йиғилишида Қозоғистон учун битта эмас, учта АЭС қуриш стратегик аҳамиятга эга эканлигини таъкидлаган эди. Давлат раҳбари Қозоғистон учун келгуси ўн йилликларда жадал иқтисодий ривожланиш учун мустаҳкам пойдевор яратадиган янги энергетика тармоғини яратиш стратегик аҳамиятга эга эканини айтган.
2025 йил июль ойида Бош вазирнинг биринчи ўринбосари Роман Скляр Қозоғистондаги иккинчи ва учинчи АЭСни Хитой томони қуришини маълум қилган эди.
